Estes tres obradoiros que se describen máis abaixo están programados de xeito simultáneo nas seguintes datas: 2 outubro, 6 novembro, 4 decembro, 5 febreiro, 2 abril. Cada unha desas datas é, polo tanto, unha alternativa que se ofrece como oportunidade de facer algún dos tres obradoiros. Así, é posible facer máis dun obradoiro, mesmo os tres, se te inscribes en meses diferentes a cada un deles. O obradoiro programado realizaríase sempre que se xunte un número mínimo de 7 persoas e non se admitirá a máis de 15 por quenda. Se non es unha das persoas seleccionadas sempre podes anotarte o mes seguinte ou  noutro que che veña ben.

Se estás interesado/a en realizar algún dos obradoiros debes anotarte no seguinte enlace:
https://forms.office.com/e/ikEcpy3juj

Comunicarase por correo electrónico a aceptación da inscrición no obradoiro así como o seu lugar de realización (en función de a que campus pertencen as persoas inscritas).

 

Xestionar a ansiedade na túa vida cotiá

Este obradoiro ensinarache como identificar e comprender sinais, síntomas e experiencias de ansiedade e estrés. Aprenderás a recoñecer, nas reaccións da túa vida cotiá, os sinais de advertencia sobre a aparición dunha ansiedade excesiva e inxustificada. No obradoiro ofrecerémosche estratexias e técnicas que poden axudarche a previr, controlar e aliviar os síntomas da ansiedade. Farás exercicios sinxelos para gañar confianza e coñecemento sobre como aplicar, no teu contexto habitual, algunhas técnicas para xestionar a ansiedade.

Obxectivo: aumentar o coñecemento e a comprensión do estrés e a ansiedade, gañando confianza para aplicar técnicas de xestión da ansiedade na túa vida diaria. Espérase que con este taller poidas conseguir:

• Detectar e comprender os sinais (físicos e cognitivos) e síntomas da ansiedade desmedida.
• Lidar co estrés e a ansiedade diarios.
• Aprender estratexias e técnicas.
• Participar en exercicios individuais y grupais, para comprobar persoalmente cales che resultan útiles.

Duración: 3 horas

 

Primeiros auxilios en saúde mental

Este obradoiro proporciónache habilidades básicas para identificar sinais ou indicadores de problemas de saúde mental noutras persoas próximas e en ti mesma/o, alén de para responder a tales sinais ou indicadores.

Esperamos deste obradoiro que poidas conseguir:

• Comprender a importancia dos primeiros auxilios en saúde mental, é dicir, saber reaccionar adecuadamente para ser de axuda e non empeorar unha dificultade de saúde mental.
• Recoñecer indicadores sinxelos de saúde mental (por exemplo, estados de ánimo depresivos, ansiedade excesiva, desregulación emocional, abuso de sustancias etc.).
• Familiarizarse co plan de acción ALGEE (un esquema de cinco pasos que se emprega para brindarlle primeiros auxilios de saúde mental a alguén que se atopa nunha crise).
• Saber aplicar o diagrama de Afrontemos para axudar alguén que amosa indicadores claros de estar nunha crise con dificultades de saúde mental.
• Adquirir estratexias de autocoidado para ti mesma/o e para aconsellar calquera persoa próxima.

Duración: 3 horas

 

Construíndo relacións saudables: detectar e xestionar relacións tóxicas na túa vida

Algunhas relacións poden deixarte emocionalmente esgotada/o. Neste obradoiro explórase a diferenza entre relacións saudables e tóxicas. Comezamos identificando os sinais de alerta nas relacións tóxicas (celos, comunicación defensiva, control, culpabilización etc.). Podes aprender a recoñecer a manipulación, o comportamento controlador e o abuso emocional. O obradoiro proporciónache tamén ferramentas para establecer límites saudables mediante a práctica de técnicas de comunicación asertiva (por exemplo, aprender a dicir «non» e establecer prioridades).

Para detectar e xestionar os vínculos tóxicos é importante recoñecer claramente as características das relacións saudables. Para iso utilizamos un modelo de tres pasos:

1. Seguridade (psicolóxica e relacional) para crear unha conexión emocional positiva.
2. O vínculo emocional e a empatía como base para establecer un compromiso nas relacións.
3. Construír un sistema de relaciones aberto, xenuíno e de confianza

O obradoiro pode resultar útil para previr calquera tipo de relación non saudable, pero especialmente se experimentaches (no presente, na infancia ou na adolescencia) algunha relación abusiva, narcisista, controladora, esgotadora. Puido acontecer no marco da parella, da familia ou da contorna laboral ou das amizades.

Duración: 3 horas