O venres 15 de decembro, ás 19 horas, inaugúrase a exposición Heritagers que terá lugar na Delegación de A Coruña do Colexio Oficial de Arquitectos de Galicia.  

Unha mostra ideada e comisariada polo arquitecto Fernando Agrasar (col. COAG nº1394), cun equipo integrado por Laura del Monte, Beatriz Ascanio, Aldara García e Cecilia Martínez –estudantes do Máster Universitario de Arquitectura–, a partir do proxecto realizado nos IV Encontros Residencia Artística no Pazo de Mariñán, do verán de 2023.

HERITAGERS propón unha reflexión sobre o patrimonio arquitectónico e o turismo, sobre a progresiva banalización do patrimonio construído e a súa transformación en ben de consumo.

A industria turística supón un importante impacto económico no noso país (61% do crecemento da economía española en 2023, cunha aportación ao PIB do 12,2%, próximo aos 160.000 millóns de euros, segundo Exceltur). A mesma fonte sinala que estes porcentaxes son só lixeiramente menores en Galicia, amosando un rápido crecemento, e supoñendo un 10,4% do PIB galego e un 11% do emprego. Este poderoso motor económico está impulsado por unha serie de atractivos entre os que se atopa o noso patrimonio construído. Heritagers propón unha reflexión sobre a súa consideración como ben de consumo, cun forte impacto nos procesos de conservación, recuperación e xestión.

A mostra está integrada por unha selección de 10 imaxes tomadas no Pazo de Mariñán e na sede da Real Academia Galega de Belas Artes. As composicións foron realizadas no verán de 2023 durante os IV Encontros Residencia Artística no Pazo de Mariñan, organizados pola Real Academia Galega de Belas Artes e acollidos pola Deputación da Coruña. As imaxes da mostra, parcialmente alteradas dixitalmente, exhíbense en gran formato e acompañadas por unha serie de citas alusivas. Heritagers convida aos visitantes da mostra a compartir unha reflexión, irónica e transgresora, sobre o fenómeno contemporáneo do consumo turístico do patrimonio construído.  

HORARIO:

A exposición poderá visitarse en horario de apertura do COAG até o 25 de xaneiro. 

LUGAR:

COAG A Coruña

Rúa Federico Tapia, 64, 15005 A Coruña

FINANCIA:

Concellería de Urbanismo, Rehabilitación e Vivenda do Concello da Coruña

PROXECTO ORIXINAL ENMARCADO EN:

IV Encontros Residencia Artística no Pazo de Mariñán

PROXECTO ORIXINAL APOIADO POR:

Real Academia Galega de Belas Artes, RAGBA

Deputación de A Coruña

COLABORAN:

Asociación cultural Flor de Santiago

A partir do día 4 outubro, na planta -1 da Escola Técnica Superior de Arquitectura, celébrase a exposición Análise de Formas Arquitectónicas: 50 ANOS DEBUXANDO CORUÑA.

Os 50 debuxos que se expoñen non só fan homenaxe ao aniversario da ETSAC polo 50 aniversario da súa creación.

En primeiro lugar, debe servir de recordo e recoñecemento a todos os docentes (1) que pasaron pola materia de A.F.A. (Análise de Formas Arquitectónicas). Aos que se xubilaron, aos que xa non dan clase e aos que tristemente xa non están connosco: Xosé Luis Pérez Franco e, moi especialmente, ao primeiro profesor Titular de A.F.A. e membro do primeiro claustro de profesores da ETSAC, Carlos Fernández-Gago Varela. A maioría dos debuxos aquí expostos son dos cartafoles de debuxos que, Carolo, seleccionaba e gardaba todos os anos ao final de curso para a súa idea dunha publicación sobre "A Coruña debuxada polos alumnos de Arquitectura", aspiración lamentablemente truncada polo seu prematuro falecemento.

Por suposto, estes 50 debuxos e os seus autores (2), serven de homenaxe a todo o alumnado que pasou pola materia e que inevitablemente tiveron que superala, con maior ou menor esforzo, para alcanzar o seu título de Arquitecto. Unha materia que non só serve para alcanzar unha determinada habilidade gráfica senón que ao mesmo tempo ensina a observar a arquitectura, primeiro paso para representala e poder analizala para obter a necesaria aprendizaxe tanto de edificios como de espazos urbanos.

Ao seleccionar os debuxos centrámonos no debuxo da contorna urbana, pero na materia sempre houbo máis metodoloxías: debuxo de estatua, cambio de punto de vista, debuxo de imaxinación, debuxos de ideación, etc. Pero a metodoloxía pola que mellor se recoñece ao alumnado da escola é a do debuxo do natural da escena urbana. E loxicamente a cidade sede da escola, A Coruña, é o contexto urbano máis inmediato e máis utilizado para debuxar, aínda que en ocasións recorreuse a viaxes para debuxar outras cidades: Betanzos, Santiago, Porto, Roma...

Nos debuxos podemos contemplar espazos que permanecen, outros que foron transfigurados e outros nos que o simple paso do tempo e a substitución duns edificios por outros, máis modernos aínda que ás veces non necesariamente mellores que os anteriores, permiten entender a cidade como un ser vivo en constante evolución.

Por último, a selección de debuxos pensouse, inevitablemente, de maneira didáctica tanto para alumnos como para responsables académicos. Os cambios de plan de estudos obrigados por Bolonia cambiaron a maneira en que afrontamos a docencia de Análise de Formas Arquitectónicas. Obrigóusenos a unha estrutura cuadrimestral que impide unha maduración gráfica pausada do alumnado que permita obter uns debuxos tan magnificamente acabados como algúns dos que podemos contemplar nesta exposición. O alumnado debe aprender que alcanzar algúns resultados como os que aquí se mostran é cuestión de paciencia e lume lento... Urxe, por tanto, un cambio de plan que permita corrixir os desaxustes detectados no campo da representación gráfica e volver ao lume lento, garantía dos mellores resultados.

Non obstante o anterior, seguiremos usando A Coruña como aula, a mellor. Sempre limitados polo noso clima, o mellor, pero encantados de encher beirarrúas e rúas para que os alumnos aprendan e, na medida do posible, gozando do debuxo,... o mellor.

 

(1) Relación cronolóxica de profesores da materia: Carlos Fernández-Gago Varela (✞) | Jesús Arsenio Díaz García | Arturo Franco Taboada | Miguel Ángel Pérez Cid | Antonio Desmónts Basilio | Pablo Tomé Ferreiro | María Antonia Pérez Naya | Jesús Álvarez Flórez | Eduardo A. Caridad Yáñez | Xosé Luis Pérez Franco (✞) | Doce Porto, Juan Manuel | Carlos Mantiñán Campos | Fraga López, Francisco Javier | Fraga López, Fernando | Paula Fernández-Gago Longueira

 

(2) Relación de alumnos autores dos debuxos expostos Panel 1: Iglesias Vaamonde, Paula | Fuentelsaz Franganillo, Luis | Docampo Diéguez, Juan | Autor desconocido - Plaza María Pita (a color) | Autor desconocido - Plaza María Pita (a tinta) Panel 2: Vázquez Sánchez, Julia | Couselo Fernández, Antonio | Arteaga Ríos, Fernando | Crego Martínez, José Panel 3: Mantiñán Barral, Andrea | del Canto Álvarez, Francisco Javier | Díez Flórez, Fernando | Río González, David | Campos Sendón, Carlos Panel 4: Arias Montes, Josefa | Iglesias Vaamonde, Paula | Ferreiro Lorenzo, Pablo | Astudillo Cortés, Pablo | Autor desconocido - Iglesia de San Jorge Panel 5: Araujo Lazone, Hugo | Estany Garea, David Arias ¿?, Marcos | Fernández Ruiz, José Carlos | Fernández González, Juan Carlos Panel 6: Iglesias Vaamonde, Paula | Crecente Dapena, Eva | Villameriel Pérez, María José | Esteve Cambra, José Ramón Cartón Pluma 1: Álvarez Rodríguez, Amanda | Agra Romaní, Emma | Río González, David Cartón Pluma 2: Baltar Domínguez, Ramón | Álvarez Montero, Jose R. Cartón Pluma 3: Rodríguez Barros, Pablo | Álvarez Rodríguez, José Carlos Cartón Pluma 4: Campos Sendón, Carlos | Alvarado Peitieros, Sonia Cartón Pluma 5: García Calvo, Anna María | Calvelo Álvarez, Diego Cartón Pluma 6: Campos Sendón, Carlos | Crego Martínez, José Cartón Pluma 7: Cobelo López, Enrique | Álvarez Rodríguez, Amanda Cartón Pluma 8: Cebreriro Cabarcos, Jorge | Domínguez Díaz, Javier Cartón Pluma 9: Carvajal Rodríguez-Cadarso, David | Santamarta Gómez, Diego Cartón Pluma 10: Barros Guertón, J. | Carro Patiño, Iago | Conde Villar, Arturo J.