O teu traballo é un documento que está destinado a ser lido e avaliado, polo tanto deberás de ser coidadoso coa estrutura e redacción deste.

Convén prestar atención á linguaxe utilizada. O texto debe ser facilmente comprendido polo lector. Faremos uso da linguaxe especializada na materia. É recomendable utilizar frases e oracións curtas, evitando un exceso de palabras. Evita os artificios lingüísticos que compliquen a lectura  e a comprensión do texto. Axusta os contidos ao tempo establecido.

ASPECTOS FORMAIS

É importante prestar atención aos aspectos formais do texto (tipo e tamaño de letra, numeración das páxinas, interliñado, etc.) que se deben manter ao longo de todo o documento. Se tes que pegar un texto no teu traballo, para unha cita literal ou o texto dunha lei, procura escoller como opción de pegado Só valores (pega sen arrastrar formato).

Utiliza os logos, símbolos e logotipos oficiais da UDC no teu traballo, que podes descargar directamente desde a web da universidade nunha calidade óptima.

Algunhas das pautas para a Facultade de Dereito son:

Traballos Fin de Grao

• Extensión máxima de 50 páxinas (sen contar os anexos engadidos)
• Papel Din A-4
• Fonte Times New Roman, tamaño 12, para o texto e tamaño 10 para as notas aos pés de páxina
• Espazo interlineal sinxelo
• Páxinas numeradas
• Texto xustificado
• Entregar por triplicado  a versión escrita do teu traballo, encadernado en Din A4 
• Enviar a través da plataforma Moodle outra copia do traballo en formato PDF. O nome do arquivo deberá ser : Apelidos_Nome_TFG_Ano

Na portada deberán aparecer tódolos datos identificativos do traballo que se presenta, deben aparecer:

• Grao que se está a cursar
• Curso académico
• Título do Traballo (do  suposto escollido)
• Nome e apelidos do estudante
• Nome e apelidos do titor

Traballos Fin de MAXE

• Extensión recomendada non menor de 30 e non superior a 80 páxinas.
• Papel Din A-4
• Fonte Arial, tamaño 12 puntos
• Espazo interlineal sinxelo
• Páxinas numeradas
• Texto xustificado
• Entregar por triplicado a versión escrita do teu traballo, encadernado en Din A4
• Partes mínimas das que se comporá o traballo: presentación do tema escollido, desenvolvemento, conclusións e bibliografía e documentación/ materiais empregados

Na portada do traballo deberán aparecer os seguintes datos

• Denominación do posgrao (MAXE)
• Titulo do traballo: en galego ou castelán, e inglés
• Nome e titulación do/a autor/a
• Nome e cargo do/a titor/a
• Data de presentación

Deberás soster os teus argumentos utilizando diversas fontes de información que debes mencionar no teu traballo. Incluiranse libros, artigos de revistas, capítulos, actas de congresos, páxinas web, lexislación, xurisprudencia, etc.

• Citar é facer unha referencia dentro do texto a unha fonte de información utilizada de maneira literal (usando as "palabras exactas" ou parafraseando (usando as nosas propias palabras para expresar as mesmas ideas). En ámbolos dous casos cómpre citar ao autor orixinal.
• A bibliografía que engades ao final do teu traballo (por orde alfabético) é a listaxe das referencias bibliográficas das fontes utilizadas. Na área de dereito é frecuente separar da bibliografía común a lexislación e a xurisprudencia en anexos independentes. 

As citas compóñense de elementos comúns para identificar as fontes dos nosos traballos, como son o autor, o título, a data de publicación e outros datos identificativos ou que permitan a localización do documento como poden ser: o volume, fascículo, paxinación, url, data de consulta no caso de documentos en liña que poden ser modificados, etc.

Se en lugar de parafrasear a un autor, realizas unha cita literal (palabras exactas) isto resáltase no texto así:

• Texto curto: entre "comiñas" ou en cursiva para diferencialo no texto.
• Texto longo (máis de catro liñas): Parágrafo aparte sangrado en caracteres máis pequenos sen comiñas nen cursiva.

Se tes dúbidas, consulta nas infoguías o tipo de citas que existen.

Nos Traballos Fin de Grao e Fin de Mestrado en Dereito na UDC, as citas teñen que seguir unhas Pautas  aprobadas pola Comisión de Garantía da Calidade do centro que están baseadas na Norma AENOR UNE 690-2024 (nesta infoguía atoparás un pequeno resumo sobre a norma UNE-690).

Neste área é particularmente importante observar como cómpre facer as citacións de lexislación e xurisprudencia segundo esas pautas.

Recomendámosche utilizar un xestor bibliográfico para recompilar e xestionar as referencias bibliográficas que vaias a utilizar no teu traballo e para realizar a redacción do mesmo, xa que facilita a súa elaboración seguindo as pautas de estilo anteriormente mencionadas.

Un xestor bibliográfico ou xestor de referencias bibliográficas é uhna aplicación informática que se utiliza para organizar as referencias bibliográficas, procedentes de diferentes fontes de información. Permiten a creación de bases de datos personais nas que o investigador pode recompilar, gardar, actualizar e ordenar un gran volume de referencias bibliográficas.

Cada persoa usuaria crea, actualiza e mantén a súa base de datos bibliográfica segundo as súas necesidades. Pódense cargar as referencias de forma manual ou automática, a partir de buscas en catálogos, bases de datos ou portais de revistas electrónicas.

• Recompilar de forma automática referencias bibliográficas extraídas de bases de datos, catálogos de bibliotecas e páxinas web.
• Almacenar, organizar, editar e buscar as referencias gardadas.
• Cargar PDFs nas referencias de maneira que se poden visualizar e engadir anotacións
• Insertar as citas no texto e a pé de páxina ao redactar un traballo (mediante a instalación dun plugin no procesador de texto).
• Xerar esas citas e bibliografía conforme a un formato normalizado/ estilo bibliográfico de cita
• Compartir con outros usuarios as referencias bibliográficas e a bibliografía.
• Exportar a información a outros xestores bibliográficos ou descargala noutros formatos (RIS, BibTex…) e mesmo en .tsv (o que che permite converter a información nun arquivo .csv)

Existen moitos xestores que podes utilizar:

Recomendamos o uso de Refworks porque nel atoparás configurado un estilo especial para citar bibliografía na área de dereito. Este estilo segue as Pautas marcadas pola Facultade de Dereito da UDC para a entrega de TFGs

O nome do estilo é o seguinte, dependendo do idioma no que estés redactando o teu traballo:

• TFGs DER UDC – Español (basado en ISO-690)
• TFGs DER UDC – Galego (baseado en ISO-690)

Para seleccionar o dito estilo en Refworks debes premer nas Opcións de visualización que hai na marxe superior dereita e premer na rodiña que aparece na subopción Visualización de citas e alí seleccionar o estilo entre os Estilos institucionais.

Organiza as túas referencias por carpetas e utilizando etiquetas segundo as túas necesidades

Revisa sempre a información cuando importes/cargues referencias desde as bases de datos, catálogos, webs…

Temos que ter en conta que as fontes de información de onde obtemos as referencias que importamos a un xestor son variadas e algunas ofrecen información moi completa pero outras escasa, ou mesmo teñen inconsistencias á hora de importar.

É importantísimo vixiar o seguinte:

• Ás veces por defecto, se o xestor non atopa a información suficiente nos metadatos dos documentos que importamos para saber de que tipo de referencia se trata, dalles a categoría de documento Xenérico. É moi importante que o tipo de referencia/ tipoloxía documental que se asigna sexa a correcta porque en función diso despléganse uns campos de información ou outros.

• Hai que revisar a información introducida en cada campo para que cando redactemos o noso traballo co procesador as referencias se visualicen correctamente, en especial:

- Que esté no campo correcto

- Que a orde da información sexa correcta (ás veces os apelidos e nomes dos autores impórtanse invertidos)

- Que non sobre ou falte información. Neste sentido é recomendable que a url leve ao documento orixinal se está en aberto (se o documento ten DOI a url substitúese por este) ou se elimine esta información se é un documento pechado.

Na área de dereito é frecuente que as bases de datos non conten con ferramentas automatizadas para importar a información ao teu xestor, sobre todo no caso da Lexislación e a Xurisprudencia. Neste caso terás que meter a información manualmente cando non existan outras opcións. Consulta neste apartado como introducir os datos e en que campos para unha correcta visualización mentres redactas.

Descárgate o plugin para a teu procesador de texto. Todos os xestores teñen extensións para instalar neles e poder citar e xerar bibliografía a medida que traballas e son moi fáciles de utilizar.

Estas monografías, que forman parte dos fondos da biblioteca, poden axudarte na elaboración do teu traballo.