Desde 1987, a Facultade de Dereito da Universidade da Coruña é un centro de ensino universitario público, moderno e de calidade. A súa finalidade esencial de formación de xuristas é concibida como un servizo público prestado con obxectividade e rigor, nun marco de valores éticos xeralmente aceptados.

Na actualidade, pódense cursar no noso Centro o grao en Dereito, a Simultaneidade de estudos: grao en Dereito + grao en Administración e Dirección de Empresas (ADE), o grao Aberto e o grao Bilingüe. O Programa de Posgrao dispón de catro mestrados universitarios: mestrado universitario en Dereito Dixital e da Intelixencia Artificial (MUDDIA), dobre mestrado Widener, mestrado universitario en Avogacía e o mestrado universitario en Avogacía + Fordham Certificate, impartido en colaboración cos Ilustres Colexios Profesionais de Avogados da Coruña e de Ferrol.

O noso persoal docente e investigador ten un elevado nivel de formación, referendado polas acreditacións recibidas das axencias de calidade autonómica (ACSUG) e estatal, polas súas publicacións e pola obtención de fondos en convocatorias públicas competitivas orientados a financiar os grupos de investigación.