A Facultade | Graos | Mestrados | Doutoramento | Investigación | Calidade
O mércores 10 de maio, ás 13.00 h., no Salón de Graos da Facultade de Filoloxía, terá lugar o acto central da conmemoración do Día das Letras Galegas, que este ano virá da man de Damián Villalaín, biógrafo do homenaxeado e membro da Comisión Executiva da Fundación Carlos Casares.
Damián Álvarez Villalaín é licenciado en Historia da Arte e exerce como profesor do Departamento de Teoría e Historia das Artes Escénicas na Escola Superior de Arte Dramática de Galicia. Foi redactor da revista Tintimán e do xornal La Voz de Galicia, ben como xefe da sección de Cultura de Atlántico Diario. Foi vogal do Consello Reitor do Instituto Galego das Artes Escénicas e Musicais (IGAEM), en 1988 estivo á fronte do gabinete de Prensa e Publicacións do Concello de Santiago de Compostela e foi director do Centro Dramático Galego entre 1989 e 1991, ano en que asumiu a subdirección de Editorial Galaxia. Desde 2002 codirixe nesta editora a colección da Biblioteca Básica de Teatro. Membro da Asociación de Directores de Escena de España, é crítico teatral e autor de varios artigos sobre, entre outros temas, a dramaturxia galega contemporánea e Carlos Casares. Vén de publicar a biografía Carlos Casares. Vida e literatura destinada ao público adolescente.
Como vén sendo tradicional nos actos conmemorativos do Día das Letras Galegas na Facultade de Filoloxía, durante a celebración tamén se fará público o fallo do XXIV Certame de Creación Literaria e Ensaio e terá lugar a entrega de premios e accésits ás persoas galardonadas.