1. Para acceder ás ensinanzas oficiais de máster será necesario posuír un título universitario oficial español de grao ou equivalente ou, de ser o caso, dispoñer doutro título de máster universitario, ou títulos do mesmo nivel que o título español de grao ou máster expedidos por universidades e institucións de educación superior dun país do EEES (anexos III e IV da normativa de preinscrición e matrícula nos másteres universitarios para o curso académico 2025-26) que no dito país permita o acceso aos estudos de máster.

2. Así mesmo, poderán acceder a unha titulación de máster universitario do sistema universitario español persoas en posesión de títulos procedentes de sistemas educativos que non formen parte do EEES, equivalentes ao título de grao, sen necesidade de homologación do título, pero si de comprobación por parte da Universidade do nivel de formación que implican, sempre e cando o título permita acceder a estudos de nivel de posgrao universitario no país onde se expedira. En ningún caso o acceso por esta vía implicará a homologación do título de acceso nin o seu recoñecemento para outros efectos que o de realizar os estudos de máster.

3. Excepcionalmente, de conformidade co disposto no artigo 18.4 do Real decreto 822/2021, o estudantado ao que lle falte por superar o TFG e como máximo ata 9 créditos ECTS poderá acceder e matricularse nun máster universitario de acordo coa normativa da UDC para estes supostos, aínda que en ningún caso poderá obter o título de máster se previamente non obtivo o título de grao. En calquera caso, o estudantado que dispoña do título universitario oficial de grao terá prioridade na asignación de prazas.

4. Para seguir con normalidade as actividades docentes e aproveitar adecuadamente a docencia recibida, os/as solicitantes de estados con lingua oficial distinta do español ou portugués deberán acreditar a competencia lingüística conforme ao disposto no capítulo VI da normativa de preinscrición e matrícula nos másteres universitarios para o curso académico 2025-26.

5. As persoas interesadas acreditarán o cumprimento dos requisitos de acceso e admisión para cada máster nos prazos sinalados para realizar a preinscrición.

Requisitos xerais da documentación para todos os solicitantes:

1. Os documentos deben ser oficiais e expedidos polas autoridades competentes.

2. O alumnado que posúa documentación nun idioma distinto do galego ou castelán deberá acompañala da correspondente tradución oficial a calquera das dúas linguas oficiais na UDC, que deberá facer un/unha profesional de tradución xurada, español/a ou autorizado/a no país de orixe polo Consulado Español.

Non será precisa a tradución oficial cando se trate de documentos redactados na lingua inglesa, francesa, portuguesa ou italiana. Nestes casos bastará a tradución que realice a propia persoa interesada, prevalecendo, se houbese discrepancia, a tradución que realice a UDC.

3. No suposto de documentación traducida con selo da tradución xurada nos casos en que esta sexa necesaria, deberán enviar copias de:

a) Documentos orixinais sen traducir (sen selo da tradución xurada)

b) Documentos orixinais traducidos (con selo da tradución xurada)

4. Todos os documentos enviados xunto coa solicitude poderán ser copias simples, pero deberán subir unha declaración responsable de que os documentos e datos presentados son fidedignos.

5. As persoas solicitantes deberán presentar os orixinais para ser cotexados, de ser o caso, na Administración do centro de adscrición do máster.

6. A comisión académica/de selección de cada máster poderá requirir, se o considera preciso, a entrega doutra documentación.

Calquera omisión ou falsidade nos datos declarados e na documentación enviada poderá dar lugar á exclusión do proceso de adxudicación de prazas e, de ser o caso, á anulación da matrícula, independentemente das sancións administrativas ou penais que correspondan.

1. Os documentos académicos expedidos no estranxeiro (títulos e certificacións académicas) deberanse presentar legalizados por vía diplomática ou, de ser o caso, mediante a Apostila da Haia.

2. Para legalizar os documentos por vía diplomática deben ser presentados:

1. No Ministerio de Educación do país onde se expediron os documentos.
2. No Ministerio de Asuntos Exteriores do país onde se expediron os documentos.
3. Na representación diplomática ou consular de España nese país.

3. Para legalización de documentos expedidos por países asinantes do Convenio da Haia (véxase a relación destes países no anexo V da normativa de preinscrición e matrícula nos másteres universitarios para o curso académico 2025/26), deben ser presentados:

1. No Ministerio de Educación do país onde se expediron os documentos.
2. No Ministerio de Asuntos Exteriores ou ministerio correspondente do país onde se expediron os documentos.