Sr. Presidente do Consello Social da UDC

Autoridades

Membros da comunidade universitaria

Familiares, amigas e amigos todos

Como vén sendo tradicional, aproveitamos o Día da Universidade –instituído no seu día en honra do patrón dos estudantes, San Tomé– para entregar os premios extraordinarios de bacharelato, de fin de carreira e de doutoramento.

Hai só uns minutos rematamos tamén un acto específico para entregarlles os seus distintivos aos alumnos e alumnas que concluíron a súa formación como investigadores logo de presentar a súa tese de doutoramento.

Os meus parabéns para todos os que acabades de recibir o recoñecemento público da Universidade da Coruña como os mellores estudantes nos distintos graos e programas de doutoramento que se imparten nos campus da Coruña e de Ferrol.

Parabéns tamén para os bachaleres sobresaíntes que acaban de chegar ás nosas facultades e escolas co aval da súa exemplar capacidade de estudo e de traballo.

Uns e outros, nos distintos niveis académicos, constitúen os elos dunha prezada cadea de compromiso, responsabilidade e talento, que tanto nos enorgullece como nos estimula a todos os membros da comunidade universitaria.

Recibide a miña felicitación persoal e os parabéns máis sinceros no nome da Universidade da Coruña. Fágollela extensiva aos vosos familiares e amigos, xustamente recompensados e gratificados hoxe polo voso éxito nas aulas.

--

Unha universidade moderna e dinámica como a nosa asume as funcións que lle son propias nesta altura do século XXI. Temos que ensinar, investigar e facilitar a innovación no tecido social e produtivo.

Pero na Universidade do século XXI o servizo ao estudantado segue a ser o obxectivo central do noso labor.

A primeira responsabilidade, como centro público que somos, é garantir o acceso aos estudos superiores en igualdade de condicións.

A crise económica e social –en que aínda andamos– lembrounos que nunca hai que baixar a garda na defensa do dereito á educación en todos os seus niveis. E, así mesmo, que cómpre non esquecer que a formación universitaria é un instrumento esencial para a equidade e, desde logo, para a mobilidade social.

Con este principio como punto de partida, coido necesario o esforzo diario de todos os membros da comunidade universitaria (estudantes, profesorado, persoal) para traballar por unha universidade de calidade.

Nese obxectivo traballamos seguido.

Na procura dunha universidade que garanta a calidade da docencia e da investigación.

Unha universidade que mellore a calidade dos servizos universitarios.

Unha universidade que mellore a empregabilidade dos seus egresados.

Unha universidade, en fin, versátil para ler os cambios profundos que se están a producir na nosa sociedade a ritmo vertixinoso.

Ao longo destes últimos anos fíxose un esforzo, con cambios de calado, para adaptar a nosa institución aos novos tempos. Unha vez pechado ese ciclo de reformas, o noso esforzo cotiá céntrase en mellorar día a día os estándares de calidade dos graos, dos mestrados e dos programas de doutoramento.

Cos cambios introducidos, coa innovación e coas novas metodoloxías docentes presentámoslle á sociedade unha oferta de estudos que combinan o rigor propio do ensino universitario cunha cualificación mellor para se desenvolver no mercado de traballo.

Nesa mesma dirección e con ese mesmo obxectivo formulamos agora unha proposta para incorporar no curso 2018-2019 un novo grao en Xestión Industrial da Moda e dous mestrados en Deseño Industrial e en Deseño, Desenvolvemento e Comercialización de Videoxogos.

Proposta que, como xa explicamos publicamente, se completaría no curso seguinte con dous mestrados máis no ámbito da informática industrial e no do deseño e comercialización de moda.

--

Nesta altura, un ensino de calidade non se entende sen o factor da internacionalización, cuestión esta na que andamos todas as universidades europeas. Refírome hoxe, máis en concreto, á internacionalización da docencia que á da investigación, pois no terreo científico é un proceso xa anterior e maduro.

A mobilidade foi un primeiro chanzo na internacionalización académica. Veuse reforzada coa creación do espazo europeo de educación superior.

Agora estamos a configurar, mediante alianzas estratéxicas, un mapa de graos, mestrados e doutoramentos con dimensión internacional. Ao mesmo tempo, incrementamos progresivamente a oferta académica plurilingüe e a captación de estudantado estranxeiro con instrumentos eficaces como a International Summer School.

Trátase, en definitiva, de que o espírito dinámico e moderno dunha universidade tan nova como a nosa siga a facer da procura da excelencia o seu motor fundamental, tanto na docencia, como na investigación e na innovación.

Esa mesma procura da excelencia da que vós, os estudantes hoxe galardoados cos premios extraordinarios, sodes o mellor exemplo, non só para os que formamos parte da comunidade universitaria, senón tamén para a sociedade mesma.

Máis nada pola miña parte.

Reitero os meus parabéns e transmítovos con orgullo o afecto da institución que teño a honra de representar: a Universidade da Coruña de todos nós.

Moitas grazas.

A Coruña, 27 de xaneiro de 2017