Prezados membros da comunidade universitaria

Familiares, amigas e amigos:

Como vén sendo costume desde a súa creación, a Universidade da Coruña aproveita a tradicional celebración do San Tomé, patrón do estudantado e Día da Universidade, para facer público recoñecemento dos méritos dos alumnos e alumnas máis destacados en todos os seus centros dos campus da Coruña e de Ferrol.

Este ano temos a satisfacción de entregar, por primeira vez,  os premios extraordinarios fin de máster, non só do último curso, senón tamén dos dous cursos anteriores. Deste xeito cubrimos (cando menos en parte) a débeda pendente coas promocións que fixeron os primeiros posgraos oficiais do plan Boloña e poñémonos ao día.

Quero expresarvos a todos e cada un de vós, en primeiro lugar, a miña felicitación persoal, a do equipo de goberno e a do conxunto da nosa comunidade universitaria.

E, en segundo lugar, quero deixarvos constancia do noso agradecemento. O meu persoal, desde logo, pero en especial o da comunidade universitaria, á que teño a honra de representar neste acto simbólico.

Agradecemos o acreditado esforzo e dedicación para completar a vosa formación nos mestrados, con resultados óptimos, merecentes de premios extraordinarios.

O esforzo, a vontade de tirar o máximo proveito dos estudos, constitúe o mellor dos exemplos para o resto de compañeiros e compañeiras que cursan neste momento estudos tanto de máster como de grao ou  doutoramento.

E deixádeme engadir tamén o agradecemento do profesorado, porque a vosa dedicación e o voso éxito constitúen un estímulo engadido e un motivo de especial satisfacción par todos os que nos dedicamos á docencia.

∎

Hai só uns días presentouse un amplo estudo da Conferencia de Reitores das Universidades Españolas, a CRUE, para poñer, branco sobre negro, a contribución socioeconómica do sistema universitario español.

Pois ben, nese estudo constátase a rápida aceptación que tivo o máster no sistema educativo español, malia os desaxustes que se produciron inicialmente. Lémbrese que os másteres se introduciron antes mesmo que os propios graos, co que, certamente, se dificultou a configuración de ofertas docentes coherentes nas universidades.

Desde 2008 ata hoxe multiplicouse por catro a demanda para cursar másteres e, unha vez que cada universidade perfilou o seu catálogo de graos, todas fomos ofertando un abano de títulos en consonancia co perfil académico e científico de cada unha.

A Universidade da Coruña enfrontou con rigor este proceso nos últimos anos, ata consolidar unha oferta formativa de algo máis de medio cento de titulacións de máster (a maioría deles de carácter interuniversitario), dos que xa saen cada ano cerca de mil titulados.

Desenvolvemos ese proceso baixo premisas claras de calidade, innovación docente e empregabilidade.

A coherencia e a solidez da oferta de másteres ten que ir acompañada do necesario dinamismo. Dinamismo que nos permite unha continua revisión e actualización, marcadas pola propia especificidade e evolución do título e do ámbito profesional en que se insire.

Os másteres oficiais instauráronse como consecuencia do proceso de converxencia europea da educación superior, coñecido como proceso ou plan Boloña.

No planeamento da Universidade da Coruña propuxémonos entón aproveitar un cambio de tal alcance (en titulacións, metodoloxía, etcétera) como unha oportunidade única para modernizar a nosa capacidade académica.

Ao cabo, a adaptación ao Espazo Europeo de Educación Superior implicou unha renovación profunda da oferta educativa da UDC.

Os cambios fixéronse tendo como un dos seus eixes fundamentais establecer unha maior e mellor vinculación coas necesidades do noso contorno social, económico e cultural.

Sen dúbida, no obxectivo de achegar as competencias adquiridas na universidade ás competencias requiridas por empresas e administracións, resulta determinante a calidade e a eficacia dos másteres oficiais.

∎

Unha vez que a comunidade universitaria nos renovou a confianza a min a ao meu equipo, dispoñémonos a avanzar no camiño trazado cun amplo e ambicioso programa de expansión.

Un dos moitos proxectos e ideas que imos poñer en marcha é darlle un impulso notable á obtención dos selos europeos de acreditación, tanto de graos como de mestrados.

Do mesmo xeito, a reconfiguración dos campus como Campus Innova e Campus Sustentabilidade, na Coruña, e Campus Industrial en Ferrol, levaranos a unha actualización da oferta formativa asociada aos campus especializados.

As iniciativas nesta liña serán, obviamente, de moita importancia para o fortalecemento dos nosos másteres e dos que poidamos preparar nun futuro inmediato en colaboración con outros campus, particularmente cos doutros países.

Porque esta, a internacionalización, é outra das liñas estratéxicas sobre as que discorre a xestión da Universidade da Coruña nos últimos anos: potenciar a participación dos nosos investigadores en redes e proxectos europeos e afondar na dimensión académica da internacionalización.

Temos avanzado moitísimo neste ámbito e seguirémolo facendo, porque o mundo globalizado en que andamos a vivir demanda que da universidade saian profesionais co nivel de preparación óptimo para desenvolver o seu traballo en calquera lugar do mundo, cun elevado grao de formación e de capacidade de integración en equipos interdisciplinares.

Imos dotar a UDC dun plan específico de captación de estudantes  de grao e de máster e, de xeito paralelo, seguiremos a impulsar os títulos internacionais e os dobre títulos, como xa se vén facendo.

Incrementando os convenios con universidades de todo o mundo e ancheando a oferta de títulos plurilingües e dobres atraeremos máis estudantes estranxeiros.

∎

As universidades do século XXI atópanse no centro dun modelo económico baseado no coñecemento. A sociedade debe ser consciente deste rol reforzado que é decisivo para o seu futuro inmediato.

Cando a Unión Europea formula unha nova axenda para a educación superior nos estados membros está advertindo, con clareza, que non seremos quen de responder aos grandes desafíos, presentes xa no día a día (dixitalización e robotización, por exemplo), sen contar con profesionais de alta cualificación capaces de enfrontalos con solvencia.

Nese obxectivo traballamos e a todas e todos correspóndenos achegar visión de futuro, esforzo, calidade e colaboración.

Remato xa.

Para a Universidade da Coruña é motivo de orgullo recoñecer ao alumnado máis destacado dos másteres oficiais dos tres últimos cursos.  Con este acto simbólico facemos público recoñecemento do seu talento e do seu esforzo.

Parabéns de novo e moitas grazas por confiar na Universidade da Coruña.

 

A Coruña, 27 de xaneiro de 2020