Esta convocatoria ten por obxecto o recoñecemento daqueles Traballos de Fin de Grao (TFG) e/ou Traballos de Fin de Mestrado (TFM) defendidos ao longo do curso 2023/2024 que mellor integraren dimensións do ámbito de coñecemento da ETSNM nos seus proxectos e que sexan merecedores dunha especial distinción pola súa orixinalidade, pertinencia, relevancia e/ou proxección que poida acadar neste ámbito.

Poden ser candidatos/as nesta convocatoria os/as estudantes da ETSNM que defendan os TFG ou TFM no curso 2023/2024 cunha cualificación igual ou superior a 9,0 puntos.

Os/as candidatos/as, polo feito de se presentaren, outorgan permiso á ETSNM para publicar o traballo, na forma de póster, unha vez revisada de acordo coas indicacións da Comisión de avaliación.

Os premios concederanse en réxime de concorrencia competitiva entre os estudantes da ETSNM e serán financiados con cargo a partida orzamentaria 640A.422D.480.02. Os premios están suxeitos ás retencións que legalmente correspondan. A convocatoria e toda a información e fases difundiranse, entre outros medios, na páxina web da ETSNM.

• O primeiro premio ao TFG/TFM será de 400 €.
• O segundo premio ao TFG/TFM será de 200 €.

Así mesmo, o resto de traballos finalistas concederánselle uns accésits. Cada traballo premiado e os accésits recibirá un diploma acreditativo. Se o xurado o estimar conveniente, poderá deixar algúns ou todos os premios desertos.

Os/as candidatos/as deben cubrir a solicitude que lles aparecerá na app Telmo de TFG/TFM creada para este fin. A persoa solicitante deberá subir a Telmo, un póster do TFG/TFM, onde ten que aparecer o título, autor/a, data de defensa, obxectivos, metodoloxía, discusión e conclusións finais. Tamén é importante o uso de imaxes ou ilustracións que acompañen o contido e o fagan máis visual.

O prazo para a presentación de solicitudes no formulario vai dende o día da publicación desta convocatoria no taboleiro de anuncios da páxina web da ETSNM, e remata ás 14:00 h do día 30 de outubro de 2024.

Terminado o prazo de solicitude e revisadas as solicitudes, a ETSNM fará pública no taboleiro de anuncios da páxina web da ETSNM a listaxe das solicitudes admitidas e, de ser o caso, non admitidas, indicando as razóns das posibles exclusións. As persoas interesadas disporán dun prazo de 5 días hábiles para corrixir as deficiencias indicadas, publicándose a continuación a listaxe definitiva.

O póster do traballo (TFG ou TFM) a enviar na solicitude será elaborado pola persoa candidata conforme aos seguintes criterios:

• Organización das ideas e información máis relevante do TFG/TFM.
• Título do TFG/TFM, autor/a e data de defensa.
• A estrutura do póster ten que conter como mínimo: obxectivos, metodoloxía, discusión e conclusións finais para mostrar as ideas principais de forma clara, concisa e correcta.
• Preferiblemente o póster, segundo a norma APA, será apaisado e súa medida é 122 cm de alto por 183 cm de ancho.

Os póster dos traballos premiados publicaranse pola ETSNM baixo unha licenza Creative Commons Atribución-NonComercial-CompartirIgual 4.0 Internacional (CC BY-NC-SA 4.0). Con este obxectivo, os autores e autoras dos traballos premiados comprométense en entregar á ETSNM os orixinais dos seus traballos en formato editable (texto, imaxe, etc.) que lle sexan solicitados e a atender as indicacións de revisión que lles faga chegar dende a ETSNM.

Os premios serán resoltos e entregados durante o Acto de Graduación no mes de febreiro de 2025. As persoas gañadoras aceptan a difusión do seu nome, de ser o caso, así como o título, resumos e póster dos traballos premiados, nas comunicacións de carácter informativo ou divulgativo realizadas pola ETSNM.

De conformidade co artigo 13 do Regulamento (UE) 2016/679 do Parlamento Europeo e do Consello, de 27 de abril, relativa á protección das persoas físicas no que respecta ao tratamento de datos persoais e á libre circulación destes datos e polo que se derroga a Directiva 95/46/CE (Regulamento Xeral sobre Protección de Datos ou RGPD), comunicámoslle que a información proporcionada a través deste formulario será tratada baixo a responsabilidade da Escola Técnica Superior de Náutica e Máquinas da Universidade da Coruña, co obxectivo de xestionar os premios Foro Riazor aos Traballos de Fin de Grao (TFG) e Traballos de Fin de Mestrado (TFM).

Estes datos serán tratados durante o tempo imprescindible para alcanzar este obxectivo e serán conservados durante o período adicional dun ano ao remate das accións previstas no respectivo premio Foro Riazor aos TFG e TFM.

Ao cubrir este formulario, vostede acepta expresamente dito tratamento con propósito de cumprir a finalidade descrita e terá dereito a retirar ese consentimento en calquera momento, sen efectos retroactivos. Ten dereito a solicitar ao responsable do tratamento, en calquera momento, o acceso, a rectificación ou a eliminación dos seus datos persoais e a limitación do seu tratamento.

Tamén terá o dereito de opoñerse a este tratamento, así como solicitar, coa excepción dos casos de interese público e/ou exercicio dos poderes públicos, a portabilidade dos seus datos. Pode exercer estes dereitos a través dun escrito asinado e unha fotocopia do seu DNI enviados á Escola Técnica Superior de Náutica e Máquinas da Universidade da Coruña, coa referencia "protección de datos".

Ademais, ten dereito a presentar unha reclamación diante da Axencia Española de Protección de Datos (AEPD).