A Coruña, 10 de marzo de 2020.- A Universidade da Coruña vén de constituír o Comité de Seguimento do COVID-19, presidido polo reitor, Julio Abalde, para articular as posibles medidas necesarias ante esta situación en función das instrucións que se reciban por parte das autoridades sanitarias competentes.

O Comité está a elaborar o Plan de continxencia da UDC ante o COVID-19 que se publicará na páxina web da UDC, na que xa hai información e enlaces ás páxinas sanitarias competentes na materia onde se ofrece información actualizada.

En coordinación coa Consellería de Sanidade, estase xestionando a presenza do estudantado que realiza prácticas clínicas nos centros sanitarios de maneira conxunta. Así mesmo, aprázanse as prácticas para o alumnado destinado en centros xeriátricos, para protexer a esta poboación residencial que constitúe un colectivo fráxil e sensible. Polo momento non hai ningunha situación de risco nin nas prácticas clínicas nin nas xeriátricas nin na docencia.

A Universidade da Coruña está en contacto permanente coas autoridades competentes no tema para, se é o caso, tomar as medidas oportunas, xunto coas outras universidades galegas, de forma coordinada con Sanidade e Educación.

Información sobre o Coronavirus (COVID-19):

https://www.udc.gal/gl/prl/vixilancia/coronavirus-2019-ncov/

A Universidade da Coruña emitirá información ademais a través da app UDC, que pode descargarse desde a páxina web principal www.udc.gal