Este procedemento aplícase cando é necesario modificar guías docentes de materias oficiais fóra do período ordinario de elaboración, e non será de aplicación ás modificacións que afecte á sección "Información da Guía Docente", as cales se actualizan automaticamente na guía docente unha vez incorporados os cambios nos módulos correspondentes da aplicación de xestión académica.

O obxectivo é garantir que calquera cambio (que soamente debería producirse de maneira excepcional) estea aprobado polos órganos competentes responsables das guías que se van modificar (departamentos e centros) e validado pola coordinación da titulación antes da súa publicación.

Pasos previos

1. Identificación da necesidade de modificación

   • Quen? Profesorado da materia ou materias, coordinación da titulación ou equipos de dirección de centros e departamentos.

   • Calquera pode detectar un erro ou necesidade de actualización nas guías docentes e iniciar a proposta de modificación.

2. Aprobación previa dos cambios

   • Quen? Os órganos responsables das materias: departamentos que participan na docencia e o centro responsable da titulación na UDC.

   • Cada departamento e centro segue os seus propios procedementos internos para aprobar ou denegar modificacións. O CUFIE non intervén nesta fase, pero é imprescindible que os cambios estean aprobados por todos os departamentos implicados e polo centro responsable antes de solicitar a apertura da titulación para modificar as guías docentes afectadas.

Procedemento

1. Solicitude de apertura do período extraordinario

   • Quen? Coordinación da titulación.

   • Trámite: O coordinador ou coordinadora, unha vez teña constancia da aprobación dos cambios por parte dos órganos competentes, solicita ao CUFIE a apertura da titulación mediante o formulario específico.
     Non se deben enviar actas nin documentación adicional por outras vías. O CUFIE soamente require a solicitude formal a través do formulario.

2. Apertura da titulación para a modificación de guías docentes

   • Quen? CUFIE.

   • O CUFIE habilita o período extraordinario de edición das guías docentes para a titulación correspondente.

3. Devolución das guías afectadas

   • Quen? Coordinación da titulación.

   • A coordinación devolve as guías ao profesorado responsable das materias afectadas para que introduzan os cambios aprobados.

4. Edición das guías

   • Quen? Profesorado das materias afectadas.

   • O profesorado traslada os cambios ás guías docentes e envíaas á coordinación da titulación para a súa validación.

5. Validación e publicación

   • Quen? Coordinación da titulación.

   • A coordinación revisa as guías modificadas:

     • Se son correctas, procede á súa validación e publicación.

     • Se non son correctas, devólveas ao profesorado para corrixir (paso 4).

   • Notificación: Unha vez validadas e publicadas, o coordinador da titulación debe comunicar ao CUFIE o peche do proceso mediante unha mensaxe a gadu@udc.es.

6. Peche da titulación

   • Quen? CUFIE.

   • O CUFIE pecha o período extraordinario de modificación e notifica á coordinación da titulación que o proceso finalizou.

Consideracións importantes

• Que as actas das reunións nas que se aproben as modificacións recollan de forma clara os cambios autorizados e a súa xustificación.
• Evitar cambios que poidan prexudicar as expectativas académicas do estudantado, especialmente se afectan á metodoloxía, avaliación ou carga de traballo prevista no momento da matrícula.

Formulario de solicitude de apertura de titulación para editar modificacións de guía docente, aprobadas polo Departamento e Centro