Os Xogos Galaico-Durienses son unha competición deportiva destinada ao alumnado, persoal docente e investigador e persoal técnico de xestión e de administración e servizos das seis universidades existentes no espazo xeográfico do Norte de Portugal e Galicia: Universidade do Porto (UPorto), Universidade do Minho (UMinho), Universidade de Trás-os-Montes e Alto Douro (UTAD), Universidade de Vigo (UVigo), Universidade da Coruña (UDC) e Universidade de Santiago de Compostela (USC).
Tiveron a súa primeira edición, na Universidade da Coruña, en novembro de 1993. Este evento multideportivo acolle, en cada edición, a máis de 200 deportistas universitarios durante 2 ou 3 días e organízase de forma rotativa entre as 6 universidades. Nos últimos 30 anos organizáronse competicións en 28 modalidades deportivas, tendo sempre como premisa a equidade de xéneros na competición.