A Escola Técnica Superior de Náutica e Máquinas (ETSNM) da Universidade da Coruña, no marco das súas competencias en materia de planificación e coordinación académica, considera necesario dotarse dun instrumento normativo propio que regule o desenvolvemento das prácticas externas do seu estudantado.

As prácticas externas constitúen unha actividade formativa esencial orientada á adquisición de competencias profesionais nun contorno real de traballo, servindo de ponte entre a formación universitaria e o exercicio profesional. Ademais, representan un elemento clave para fortalecer as relacións entre a ETSNM e o sector marítimo, industrial e empresarial, así como para mellorar a empregabilidade do estudantado.

Este Regulamento establece o marco de organización, xestión, seguimento e avaliación das prácticas externas nos títulos impartidos pola ETSNM, integrando o seu funcionamento no Sistema Interno de Garantía de Calidade (SIGC) da Escola e adaptándose á normativa vixente da Universidade da Coruña e á lexislación estatal aplicable.

I.1. Obxecto e ámbito de aplicación

1. O presente Regulamento ten por obxecto establecer o marco normativo para a organización, xestión, desenvolvemento e avaliación das prácticas externas do estudantado da Escola Técnica Superior de Náutica e Máquinas (ETSNM) da Universidade da Coruña.
2. As prácticas externas constitúen unha actividade de natureza formativa, cuxo obxectivo é permitir ao estudantado aplicar e complementar os coñecementos adquiridos na súa formación académica, favorecendo a adquisición de competencias que melloren a súa empregabilidade e faciliten o seu desenvolvemento profesional.
3. Este Regulamento é de aplicación ás prácticas externas que realice o estudantado matriculado nos graos e mestrados impartidos na ETSNM.
4. As prácticas externas poderán ter carácter curricular ou extracurricular, de acordo co previsto no artigo I.4 deste Regulamento.
5. As prácticas curriculares intégranse nos plans de estudo e teñen recoñecemento académico en créditos ECTS.
6. As prácticas extracurriculares, de natureza voluntaria, poderán ser realizadas polo estudantado mentres manteña a súa condición de alumno/a da UDC, con fins formativos complementarios.
7. As prácticas extracurriculares rexeranse polo mesmo marco normativo, criterios de calidade e procedementos xerais establecidos neste Regulamento, agás as especificidades propias recollidas expresamente para esta modalidade.
8. Todas as prácticas externas deberán formalizarse mediante o correspondente convenio de cooperación educativa entre a Universidade da Coruña e a entidade colaboradora.

I.2. Marco normativo

As prácticas externas reguladas por este documento réxense polo disposto en:

1. O Real Decreto 592/2014, de 11 de xullo, polo que se regulan as prácticas académicas externas do estudantado universitario.
2. O Regulamento de prácticas externas da Universidade da Coruña, aprobado polo Consello de Goberno da UDC.
3. O Manual do SIGC da ETSNM da Universidade da Coruña, especialmente na “Dimensión 03, Procedemento 05: Prácticas externas”.
4. O presente Regulamento de Prácticas Externas da ETSNM e os seus anexos.
5. Calquera outra disposición de rango superior que resulte de aplicación en materia de prácticas formativas universitarias.

I.3. Finalidade e obsectivos

1. As prácticas externas teñen como finalidade fundamental complementar a formación académica recibida na ETSNM mediante a inmersión do estudantado en contornos profesionais reais.
2. Os seus obxectivos específicos son:
   1. Facilitar a adquisición e o desenvolvemento de competencias profesionais, técnicas e transversais.
   2. Favorecer a empregabilidade e inserción laboral do estudantado.
   3. Fomentar a aprendizaxe práctica e a responsabilidade profesional.
   4. Promover a colaboración estable entre a ETSNM e as empresas, institucións e organismos do sector.

I.4. Modalidades de prácticas externas

1. As prácticas externas que realice o estudantado da ETSNM clasifícanse en dúas modalidades:
   1. Prácticas curriculares, integradas no plan de estudos de cada grao e vinculadas a materias con recoñecemento académico de créditos ECTS.
   2. Prácticas extracurriculares, de carácter voluntario, que non forman parte do plan de estudos pero se recoñecen como actividade formativa complementaria no expediente académico do estudantado.
2. Ambas modalidades comparten os mesmos obxectivos formativos, principios de calidade, requisitos de seguridade e procedementos de seguimento e avaliación, conforme ao disposto neste Regulamento.
3. As prácticas extracurriculares non poderán en ningún caso:
   1. Substituír postos de traballo ou funcións estruturais da empresa.
   2. Implicar relación laboral nin remuneración que altere a súa natureza formativa.
4. A duración máxima das prácticas extracurriculares será a establecida polo Regulamento da Universidade da Coruña e polo Real Decreto 592/2014, do 11 de xullo, polo que se regulan as prácticas académicas externas do estudantado universitario, non podendo superar as 900 horas por curso académico.
5. O estudantado poderá realizar prácticas extracurriculares en calquera momento do curso académico, sempre que non interfiran coas súas obrigas académicas e que se cumpran as condicións de seguridade, seguro e seguimento establecidas pola ETSNM.
6. As prácticas extracurriculares poderán desenvolverse tanto en terra como a bordo, sempre que o buque, instalación ou empresa colaboradora cumpra os requisitos formativos e legais correspondentes.
7. En todos os casos, deberá formalizarse un proxecto formativo individualizado, validado pola CPE, que especifique os obxectivos, tarefas e competencias a desenvolver.

II.1. Estrutura organizativa

O desenvolvemento e a xestión das prácticas externas na ETSNM estrutúranse arredor dos seguintes órganos e figuras:

1. A Comisión de Prácticas Externas (CPE), como órgano encargado da planificación, coordinación, seguimento e avaliación do proceso das prácticas externas.
2. O/a Titor/a Académico/a (TA), responsable da supervisión e avaliación académica do estudantado en prácticas.
3. O/a Titor/a Profesional (TP), designado pola entidade colaboradora, encargado da tutela directa e supervisión das tarefas realizadas polo estudante no centro de prácticas.
4. O estudantado, suxeito protagonista do proceso formativo, que deberá cumprir co proxecto e as normas establecidas.
5. A Dirección da ETSNM, que velará pola correcta aplicación do Regulamento e pola integración do proceso de prácticas no SIGC.

II.2. Comisión de Prácticas Externas (CPE)

II.2.1. Composición

1. A CPE estará composta por:
   1. O/a Subdirector/a de Organización Académica (SOA), que actuará como presidente/a.
   2. O/a Coordinador/a de Prácticas do Grao en Máquinas Navais (CM).
   3. O/a Coordinador/a de Prácticas do Grao en Náutica e Transporte Marítimo (CN).
   4. Cando se considere oportuno, poderán participar, con voz pero sen voto, outros membros do persoal docente, de administración e servizos ou persoas expertas do sector convidadas pola CPE.
2. O/a presidente/a poderá delegar funcións noutros membros da CPE cando as circunstancias así o requiran. Un/ha dos seus membros actuará como secretario/a, encargado/a da redacción das actas e da custodia da documentación xerada.

II.2.2. Funcións da CPE

Correspóndenlle á CPE as seguintes funcións:

1. Elaborar, revisar e actualizar periodicamente o Regulamento de Prácticas Externas da ETSNM.
2. Captar novas empresas e institucións colaboradoras, así como renovar e manter os convenios existentes.
3. Establecer os criterios de asignación de prazas, garantindo transparencia e igualdade de oportunidades.
4. Designar os/as TA e aprobar as correspondencias entre estudantes, titores/as e empresas.
5. Aprobar os modelos de proxecto formativo, as rúbricas de avaliación e as enquisas de seguimento e satisfacción.
6. Definir a ponderación da nota final entre a avaliación do TA e do TP, revisándoa anualmente.
7. Velar polo cumprimento das normas de seguridade, confidencialidade e ética profesional nas empresas colaboradoras.
8. Supervisar o correcto desenvolvemento das prácticas e resolver incidencias que excedan a competencia do/a TA.
9. Asesorar aos/ás TA na avaliación da memoria do estudantado, cando así o soliciten os/as TA.
10. Xestionar a base de datos de empresas colaboradoras e manter o rexistro histórico de convenios.
11. Promover accións de mellora continua baseadas nas enquisas e informes anuais.
12. Emitir un Informe anual de seguimento das prácticas, que será presentado á Dirección e incorporado ao SIGC.
13. Asesorar á Dirección da ETSNM e á Xunta de Escola nas decisións relativas ás prácticas externas.

II.2.3. Funcionamento

1. A CPE terase que reunir como mínimo unha vez por curso, onde se traten os seguintes puntos:
   • Planificar o ciclo anual de prácticas.
   • Analizar resultados e elaborar o informe anual do anterior curso.
2. Poderá reunirse tamén de forma extraordinaria por solicitude da Dirección ou da maioría dos seus membros.
3. Das sesións levantarase acta asinada polo/a secretario/a e aprobada na seguinte reunión.
4. As reunións poderán ser presenciais ou telemáticas, garantindo a validez das deliberacións.

II.3. Titores/as Académicos/as (TA)

II.3.1. Designación e perfil

Cada estudante terá asignado un/ha TA, membro do persoal docente e investigador da ETSNM. A súa designación será competencia da CPE, tendo en conta:

• A afinidade entre o ámbito das prácticas e a docencia ou experiencia profesional do/a titor/a.
• A distribución equilibrada de cargas docentes.
• A dispoñibilidade e aceptación voluntaria da titorización.

II.3.2. Funcións e responsabilidades

O/a TA é o/a responsable da supervisión e avaliación académica do/a estudante durante todo o proceso de prácticas. As súas funcións inclúen:

1. Actuar como único representante da ETSNM ante a empresa e interlocutor/a principal do/a estudante.
2. Garantir a coherencia do proxecto formativo coas competencias e resultados de aprendizaxe do grao.
3. Revisar e aprobar o proxecto formativo inicial antes do inicio das prácticas.
4. Coordinarse co/a TP para facer o seguimento académico e técnico, mantendo comunicación fluída.
5. Realizar polo menos unha revisión intermedia das prácticas, presencial ou telemática.
6. Comprobar que se está cumprindo o proxecto formativo durante o seguimento continuado.
7. Resolver incidencias de carácter ordinario e comunicar á CPE aquelas de maior relevancia.
8. Avaliar a memoria de prácticas, así como o cumprimento dos obxectivos formativos.
9. Emitir a avaliación final académica, aplicando a rúbrica establecida pola CPE.
10. Introducir a cualificación final en SIGMA e asinar a acta correspondente.
11. Recoller e remitir á CPE os informes e enquisas das partes implicadas.
12. Velar polo cumprimento das normas de seguridade, confidencialidade, igualdade e ética profesional durante o desenvolvemento das prácticas.
13. Participar na mellora continua do Plan de Prácticas, formulando propostas de optimización.

II.4. Titores/as Profesionais (TP)

II.4.1. Designación e perfil

O/a TP será designado pola empresa ou institución colaboradora. Deberá posuír formación, cualificación e experiencia profesional axeitadas para orientar e supervisar o traballo do/a estudante no seu ámbito de actividade.

II.4.2. Funcións e responsabilidades

Son funcións do/a TP:

1. Acoller ao/á estudante e facilitar a súa integración no centro de prácticas.
2. Informar das normas internas da empresa, especialmente en materia de seguridade, prevención de riscos laborais, confidencialidade e protección ambiental.
3. Supervisar o cumprimento do proxecto formativo, garantindo a adecuación das tarefas ao nivel académico do/a estudante.
4. Asegurar que as tarefas asignadas non supoñan relación laboral nin substitúan funcións estruturais da empresa.
5. Avaliar o progreso do/a estudante, emitindo o informe final conforme ao modelo oficial.
6. Manter contacto co/a TA, informando de incidencias, atrasos ou modificacións.
7. Facilitar un entorno de aprendizaxe e orientación profesional.
8. Cumprir coa confidencialidade dos datos académicos do estudante e coas normas de protección de datos da UDC.
9. Cubrir as enquisas de valoración e satisfacción establecidas pola ETSNM.
10. Cooperar co TA e coa CPE na mellora continua do programa de prácticas.
11. Respectar e promover os principios de igualdade, diversidade e dignidade recollidos neste Regulamento.

II.5. Obrigas do estudantado

O estudantado deberá:

1. Participar nas sesións informativas previas e seguir as instrucións da ETSNM.
2. Cumprimentar os datos e formularios obrigatorios en TELMO e SIGMA.
3. Estar cuberto polo seguro de accidentes e responsabilidade civil contratado pola UDC.
4. Cumprir coas normas de ética, seguridade, confidencialidade e prevención de riscos da empresa.
5. Desenvolver con responsabilidade as tarefas asignadas e acadar os obxectivos formativos.
6. Informar ao/á TA o grao de cumprimento dos obxectivos das súas prácticas externas.
7. Elaborar a memoria de prácticas conforme ao modelo oficial nos prazos establecidos.
8. Cumprimentar a enquisa final de avaliación e entregar a documentación nos prazos establecidos.
9. Informar ao/á TA de calquera incidencia relevante.
10. Non abandonar o centro de prácticas sen autorización expresa do/a TA e do/a TP.
11. Respectar os principios de igualdade, diversidade, respecto e convivencia establecidos neste Regulamento e nos valores da ETSNM e da UDC.

II.6. Criterios de asignación de prazas

1. A CPE establecerá anualmente os criterios obxectivos de asignación de prazas, que serán publicados antes do inicio do proceso de solicitude.
2. Estes criterios garantirán os principios de transparencia, mérito, capacidade e igualdade de oportunidades, conforme aos valores da Universidade da Coruña e da ETSNM.
3. Poderán considerarse, entre outros, os seguintes criterios específicos de asignación:
   1. Expediente académico do estudante.
   2. Número de materias pendentes para completar o grao.
   3. Dispoñibilidade temporal para incorporarse á práctica no momento en que xurda a oportunidade.
   4. Preferencia polo tipo de prácticas (a bordo ou en terra) indicada polo/a estudante e, no caso das prácticas a bordo, pola tipoloxía de buque ou ámbito operativo que mellor se axuste ao seu perfil formativo e dispoñibilidade de prazas.
   5. Certificados profesionais obrigatorios (STCW, seguridade, prevención de riscos, etc.), cando sexan requisito do posto.
   6. Adecuación do perfil do estudante á praza ofertada, considerando se se require alumnado do GNTM ou do GMN, e outros condicionantes específicos da empresa (por exemplo, residencia próxima ao centro de traballo, coñecemento dun idioma determinado ou requisitos técnicos concretos, etc).
   7. Cumprimento de prazos e documentación no proceso de solicitude.
   8. Nivel de idioma estranxeiro cando a práctica se desenvolva en contornos internacionais.
   9. Recomendación do/a TA, cando existan motivos pedagóxicos, formativos ou de outra índole.
4. A CPE poderá reservar prazas para:
   • Programas de mobilidade internacional.
   • Convenios institucionais con prazos ou requisitos específicos.
   • Situacións persoais ou académicas xustificadas (necesidades especiais, adaptación curricular, etc.).
5. As asignacións publicaranse mediante resolución da CPE e serán vinculantes, agás causas xustificadas debidamente acreditadas.
6. En casos excepcionais (renuncia da empresa, cancelación da praza ou imposibilidade sobrevida), a CPE poderá reaxustar a asignación garantindo, na medida do posible, a igualdade de oportunidades e o mantemento das condicións académicas.
7. As prazas de prácticas externas que teñan vinculación directa con materias curriculares terán carácter preferente para o estudantado matriculado nelas.
8. Terán prelación, en todo caso, as prácticas curriculares sobre as extracurriculares.
   1. As prácticas extracurriculares poderán ofertarse unicamente cando existan prazas vacantes non cubertas polo estudantado con dereito a prácticas curriculares.
   2. A CPE poderá reservar un número limitado de prazas específicas para prácticas extracurriculares, sempre que isto non prexudique a cobertura das prazas curriculares.
9. As listaxes de asignación deberán identificar claramente a modalidade de práctica (curricular ou extracurricular) e conservarase rexistro de todas as adxudicacións no expediente do estudante.
10. A CPE manterá un rexistro histórico de asignacións que sirva de referencia para o control da equidade e mellora continua do proceso.

II.7. Principios e valores institucionais aplicables ás prácticas externas

1. Todas as partes implicadas, a ETSNM, a CPE, os/as TA e TP, o estudantado e as entidades colaboradoras, deberán respectar e promover os principios e valores fundamentais da Universidade da Coruña e da ETSNM, especialmente en materia de igualdade, convivencia e responsabilidade social.
2. En particular, deberán observarse os seguintes principios reitores:
   1. Non discriminación. Garantir un acceso e desenvolvemento das prácticas en igualdade de condicións, sen discriminación por razón de xénero, identidade ou expresión de xénero, orientación sexual, orixe, idade, discapacidade, crenza, ideoloxía ou calquera outra condición persoal ou social.
   2. Respecto á dignidade das persoas. Promover un trato imparcial, deferente e considerado a todas as persoas implicadas no proceso de prácticas, evitando calquera forma de acoso ou trato vexatorio.
   3. Diversidade e inclusión. Recoñecer e valorar a diversidade presente na comunidade universitaria e nos ámbitos profesionais onde se desenvolvan as prácticas, fomentando contornas de aprendizaxe abertos e inclusivos.
   4. Igualdade de oportunidades. Garantir que os procesos de asignación, seguimento e avaliación das prácticas se realicen con criterios obxectivos e non discriminatorios.
   5. Seguridade e saúde laboral. Velar polo cumprimento estrito das normas de prevención de riscos laborais e protección ambiental, tanto nas instalacións da UDC como nas entidades colaboradoras.
   6. Confidencialidade e ética profesional. Respectar a información sensible ou reservada das empresas, así como os datos persoais do estudantado e do persoal implicado.
   7. Responsabilidade institucional. Representar con profesionalidade á ETSNM e á Universidade da Coruña, contribuíndo á súa imaxe pública e reputación ética.
3. O incumprimento destes principios poderá dar lugar á revisión das condicións da práctica e, se procede, á adopción das medidas disciplinarias ou correctoras previstas pola normativa vixente da Universidade da Coruña.

III.1. Ciclo anual das prácticas

1. O proceso de prácticas externas desenvolverase cunha periodicidade anual, coincidindo co curso académico da ETSNM, e artellarase nas seguintes fases fundamentais:
   1. Información e orientación ao estudantado.
   2. Oferta e solicitude de prazas.
   3. Asignación de prazas e designación de titores/as.
   4. Formalización do convenio e da documentación.
   5. Desenvolvemento e seguimento das prácticas.
   6. Avaliación final.
   7. Informe anual e mellora continua.
2. A CPE elaborará cada curso un calendario orientativo que especifique as datas de apertura e peche de cada fase, garantindo a difusión pública do mesmo a través da web e dos taboleiros oficiais da ETSNM.
3. A Dirección da ETSNM poderá autorizar axustes extraordinarios de calendario, por razóns académicas, organizativas ou de dispoñibilidade das empresas colaboradoras.

III.2. Información e orientación ao estudantado

1. Ao inicio de cada curso académico, a CPE organizará sesións informativas dirixidas ao estudantado dos graos GNTM e GMN, nas que se explicará:
   • A finalidade e requisitos das prácticas externas.
   • As fases do proceso e o calendario anual.
   • As modalidades dispoñibles (a bordo e en terra).
   • Os procedementos de inscrición, asignación e avaliación.
   • Os dereitos e obrigas do estudantado, titores e empresas.
2. Esta información estará permanentemente dispoñible nos medios oficiais da ETSNM e actualizarase anualmente.
3. O estudantado poderá solicitar orientación individualizada á CPE ou ao seu/súa TA sobre cuestións específicas do proceso.

III.3. Oferta e solicitude de prazas

1. A oferta de prazas será elaborada pola CPE, coa colaboración do persoal titor e da Dirección da ETSNM, a partir de:
   1. Convenios vixentes con empresas e institucións.
   2. Novas ofertas de colaboración xestionadas durante o curso.
2. As entidades colaboradoras deberán indicar, para cada praza ofertada:
   • A denominación e descrición das tarefas.
   • A titulación á que vai dirixida (GNTM ou GMN).
   • A duración e calendario previsto.
   • O horario e lugar de realización.
   • O TP designado.
   • Os requisitos específicos (idiomas, certificados, dispoñibilidade, etc.).
3. A CPE publicará a listaxe de prazas vacantes non cubertas e abrirá un prazo de solicitude por parte do estudantado, que se realizará a través da plataforma TELMO ou doutro medio designado pola ETSNM.
4. As solicitudes deberán incluír, cando se requira:
   • Unha declaración de preferencia por tipo de práctica (a bordo/en terra).
   • As preferencias de tipo de buque ou sector.
   • Unha carta de motivación e o CV actualizado.
   • A documentación acreditativa de certificados profesionais ou coñecementos lingüísticos.
5. O estudantado poderá indicar ata tres opcións de preferencia, que serán tidas en conta pola CPE no proceso de asignación.
6. O incumprimento dos prazos e formas de entrega establecidos pola CPE poderá implicar unha penalización de ata o 20% da cualificación final, salvo causa xustificada e debidamente acreditada.

III.4. Asignación de prazas e designación de titores/as

1. A CPE aplicará os criterios de asignación de prazas establecidos no artigo II.6 deste Regulamento.
2. Unha vez aberto o prazo para realizar as prácticas, e a medida que o estudantado se vaia apuntando, a CPE realizará a priorización e asignación das prazas segundo a dispoñibilidade e os criterios establecidos.
3. Unha vez feita a asignación dunha praza, esta terá carácter obrigatorio e vinculante para o estudante e para a entidade colaboradora, salvo causas xustificadas debidamente acreditadas.
4. En casos excepcionais (por exemplo, renuncia da empresa, cancelación da praza ou imposibilidade sobrevida), a CPE poderá reaxustar a asignación, garantindo na medida do posible a igualdade de oportunidades e o mantemento das condicións académicas iniciais.
5. Toda asignación será comunicada oficialmente ao estudantado e quedará rexistrada na plataforma TELMO ou no sistema que determine a ETSNM.

III.5. Formalización do convenio e documentación

1. Toda práctica externa requirirá a existencia dun convenio de colaboración entre a Universidade da Coruña e a entidade colaboradora, formalizado conforme ao procedemento establecido pola UDC para prácticas externas.
2. A iniciativa para a incorporación dunha nova empresa poderá partir do/a TA, do/a TP, do estudantado ou doutra parte interesada.
   A CPE será a responsable de xestionar a tramitación administrativa do convenio, incluíndo:
   1. Verificación da idoneidade da entidade colaboradora.
   2. Solicitude, elaboración ou adaptación do texto contractual segundo modelos oficiais da UDC.
   3. Tramitación para sinatura polas partes competentes.
3. O convenio recollerá as condicións xerais de colaboración, e será complementado polo proxecto formativo individualizado, que definirá:
   • Os obxectivos e competencias que se pretenden acadar.
   • As tarefas e actividades a realizar polo estudante.
   • A duración, horario e calendario.
   • O nome do/a TA e do/a TP.
   • O sistema de seguimento e avaliación.
4. O proxecto formativo deberá ser validado polo/a TA antes do inicio das prácticas.
5. O estudantado deberá dispoñer do seguro escolar, seguro de accidentes e seguro de responsabilidade civil da UDC, así como de calquera outra cobertura específica que esixa a normativa marítima ou a empresa colaboradora.
6. Toda a documentación asociada ás prácticas (convenio, proxecto formativo, declaracións, informes e rúbricas) deberá rexistrarse en TELMO e SIGMA, segundo o procedemento establecido pola CPE.

III.6. Desenvolvemento e seguimento das prácticas

1. Durante o período de prácticas, o/a estudante deberá cumprir co horario, normas e instrucións establecidas pola empresa, baixo a supervisión do TP e o seguimento do TA.
2. O/a TA poderá ter un contacto intermedio coa empresa, presencial ou telemática, para avaliar o progreso do estudante e verificar o cumprimento do proxecto formativo.
3. O/a TP poderá solicitar modificacións menores no desenvolvemento das tarefas, sempre que non alteren os obxectivos formativos. As modificacións substanciais deberán ser aprobadas polo TA e comunicadas á CPE.
4. O estudantado deberá manter contacto periódico co/a TA, que servirá como instrumento de seguimento continuo.

III.7. Prácticas a bordo

1. As prácticas a bordo de buques mercantes constitúen unha parte esencial da formación profesional do estudantado dos graos impartidos na ETSNM, especialmente para a obtención das competencias profesionais esixidas pola normativa internacional STCW (Standards of Training, Certification and Watchkeeping for Seafarers) e pola lexislación española aplicable ás titulacións da mariña mercante.
2. Poderán realizar prácticas a bordo o estudantado que cumpra os seguintes requisitos previos:
   1. Ter superadas as materias que a CPE determine como mínimas para o embarque.
   2. Dispor da libreta marítima profesional ou do documento de identidade do mariño/a (DIM) expedida pola Dirección Xeral da Mariña Mercante (DGMM).
   3. Ter obtidos os certificados STCW obrigatorios correspondentes (Formación Básica en Seguridade, Protección Marítima, e outros segundo o tipo de buque).
   4. Dispoñer de recoñecemento médico de embarque marítimo en vigor, emitido por centro autorizado.
   5. Estar cuberto polo seguro de accidentes e responsabilidade civil da UDC, así como polas coberturas adicionais que estableza a normativa marítima.
3. O embarque do estudantado realizarase exclusivamente en buques que cumpran os seguintes requisitos:
   1. Contar coa autorización da Dirección Xeral da Mariña Mercante (DGMM) ou organismo equivalente no caso de bandeira estranxeira.
   2. Estar asegurado o/a estudante baixo o réxime correspondente (seguro marítimo, convenio ou cobertura da empresa).
   3. Dispoñer dun TP a bordo, designado pola compañía, con titulación e experiencia adecuadas para o acompañamento formativo.
   4. Ter formalizado o convenio de prácticas marítimas entre a UDC e a empresa armadora ou navieira, conforme á normativa vixente.
4. Para a superación da materia de prácticas, a duración das prácticas a bordo será a establecida na memoria do grao.
5. Calquera prolongación, redución ou fraccionamento do tempo de embarque establecido no proxecto formativo deberá ser autorizado pola CPE, logo de xustificación documentada.
6. O seguimento das prácticas a bordo realizarase mediante:
   1. A comunicación continua entre o/a estudante e o/a TA.
   2. Toda a documentación requirida no artigo III.9. deste Regulamento.
7. O estudantado deberá observar estritamente as normas de seguridade marítima, disciplina a bordo e conduta profesional, respectando as instrucións do TP do buque.
   O incumprimento destas normas poderá dar lugar á suspensión da práctica e á correspondente comunicación á CPE.
8. A CPE manterá un rexistro actualizado das empresas e buques colaboradores, incluíndo datos de contacto, tipos de buque, rutas e valoración anual da calidade das prácticas, co fin de garantir a mellora continua do programa.

III.8. Incidencias e modificacións

1. Calquera incidencia relevante (accidente, enfermidade, incumprimento, conflito, renuncia ou cambio de titor) deberá ser comunicada de inmediato ao/á TA, quen informará á CPE.
2. As modificacións de calendario, horario ou tarefas deberán ser autorizadas polo/a TA e notificadas á CPE, quen decidirá se procede actualizar o proxecto formativo.
3. No caso de incumprimento grave das obrigas por parte do/a estudante, o/a TA poderá propor a suspensión das prácticas, previa audiencia da persoa interesada, e a CPE resolverá o procedemento.
4. Cando o incumprimento proceda da empresa (por exemplo, cese da actividade formativa, vulneración de normas de seguridade, acoso ou trato discriminatorio), a CPE poderá resolver o convenio e buscar unha alternativa para o/a estudante afectado/a.
5. As incidencias de seguridade, igualdade ou convivencia seguirán o Protocolo da UDC aplicable nesta materia.

III.9. Peche do proceso e documentación final

1. Rematado o período de prácticas, deberán presentarse os seguintes documentos:
   • Informe final do TP, conforme á rúbrica do Anexo II.
   • Informe de avaliación do TA, conforme á rúbrica do Anexo III.
   • Memoria de prácticas do estudantado.
   • Enquisas de valoración e satisfacción (do/a estudante, da empresa e do/a TA).
2. O/a TA emitirá a avaliación final e remitirá a documentación completa á CPE para o seu arquivo e control de calidade.
3. A CPE elaborará, con base nesta información, un informe de resumo anual que inclúa incidencias, resultados, grao de satisfacción e propostas de mellora.

III.10. Prácticas extracurriculares

1. As prácticas extracurriculares constitúen unha actividade formativa voluntaria destinada a complementar a formación académica do estudantado mediante a aplicación práctica dos coñecementos adquiridos e o desenvolvemento de competencias profesionais.
2. Poderán acceder a estas prácticas o estudantado matriculado en calquera das titulacións da ETSNM, sempre que estean ao día nas súas obrigas académicas e administrativas coa Universidade da Coruña.
3. As prácticas extracurriculares deberán realizarse ao abeiro dun convenio de cooperación educativa entre a UDC e a entidade colaboradora, conforme á normativa vixente e aos procedementos establecidos pola ETSNM.
4. O procedemento de xestión e asignación das prácticas extracurriculares seguirá, con carácter xeral, as mesmas fases e garantías que o das prácticas curriculares, aínda que poderá simplificarse o proceso de autorización e rexistro mediante un formulario abreviado de proxecto formativo, segundo determine a CPE.
5. O estudantado terá designado un/ha TA e un/ha TP, quen exercerán as mesmas funcións de orientación, seguimento e avaliación recollidas neste Regulamento, adaptadas á natureza e duración da práctica.
6. Ao remate das prácticas, o estudantado deberá entregar unha memoria abreviada, de carácter descritivo e reflexivo, adaptada á duración e natureza da práctica.
   Esta memoria terá un formato simplificado respecto da memoria das prácticas curriculares e incluirá, cando menos, unha descrición das tarefas realizadas e unha breve valoración persoal da experiencia.
   Xunto con ela deberán presentarse as avaliacións correspondentes do/a TA e do/a TP, segundo o procedemento establecido pola CPE.
7. As prácticas extracurriculares non computarán para a obtención dos créditos obrigatorios do grao, pero poderán constar no Suplemento Europeo ao Título (extra) e no expediente académico como actividade formativa recoñecida.
8. A CPE poderá autorizar, de maneira excepcional e debidamente xustificada, o recoñecemento posterior dunha práctica extracurricular como curricular, sempre que se acredite o cumprimento dos obxectivos formativos, duración mínima e requisitos establecidos no plan de estudos.
9. A CPE manterá un rexistro específico de prácticas extracurriculares e incorporará a información agregada sobre estas ao informe anual de resultados e mellora continua.
10. En todo caso, as prácticas extracurriculares estarán suxeitas aos mesmos principios de igualdade, non discriminación, seguridade, confidencialidade e respecto á dignidade das persoas que as prácticas curriculares.

IV. Principios xerais da avaliación

1. A avaliación das prácticas externas terá carácter formativo e certificador, e ten por obxecto verificar o grao de adquisición das competencias profesionais, técnicas e transversais definidas nos plans de estudo e no proxecto formativo aprobado.
2. O proceso de avaliación garantirá os principios de obxectividade, transparencia e trazabilidade, garantindo a igualdade de trato e oportunidade para todo o estudantado.
3. A avaliación será realizada polo/a TP e polo/a TA, conforme ás rúbricas oficiais incluídas nos Anexos III e IV do presente regulamento.
4. O proceso de avaliación terá en conta tanto o rendemento técnico-profesional como as actitudes, comportamento e capacidade de integración do/a estudante no entorno de traballo.
5. En ningún caso a avaliación das prácticas poderá basearse exclusivamente en criterios de asistencia ou permanencia, senón na adquisición efectiva das competencias formativas definidas.

IV.2. Axentes avaliadores

1. Interveñen no proceso de avaliación:
   1. O/a TP, en representación da empresa ou entidade colaboradora.
   2. O/a TA, en representación da ETSNM.
   3. A CPE, como órgano de supervisión e revisión do proceso.
2. A avaliación global das prácticas resultará da integración das valoracións do/a TP e do/a TA, segundo a ponderación fixada no artigo IV.5.
3. O/a TA será responsable do proceso de revisión da nota. As reclamacións serán atendidas polo procedemento establecido pola normativa da UDC.

IV.3. Criterios de avaliación

1. A avaliación do/a estudante atenderá aos seguintes principios e procedementos xerais, aplicables ás prácticas curriculares:
   • A avaliación será realizada polo/a TP e polo/a TA mediante as rúbricas oficiais establecidas nos Anexos III e IV.
   • O proceso avaliativo terá carácter formativo e certificador, e verificará o grao de adquisición das competencias profesionais, técnicas e transversais definidas no proxecto formativo e no plan de estudos.
2. Antes da avaliación numérica, o/a TA deberá verificar que a memoria de prácticas (documento, presentación e defensa) se axusta ao proxecto formativo aprobado.
   1. Esta verificación realizarase mediante o apartado correspondente da rúbrica do/a TA, asignando o nivel de Apto ou Non apto.
   2. No caso de que a memoria non cumpra cos obxectivos e competencias definidos no proxecto formativo e reciba valoración de Non apto, a cualificación final será de Suspenso (0,0), sen proceder á avaliación numérica posterior.
3. A avaliación do/a estudante atenderá aos seguintes criterios xerais, adaptables a cada titulación e tipo de práctica:
   1. Cumprimento do proxecto formativo e das tarefas asignadas.
   2. Calidade da memoria e análise crítica da experiencia formativa.
   3. Aplicación dos coñecementos técnicos e comprensión dos procesos profesionais.
   4. Capacidade de análise, resolución de problemas e reflexión final.
   5. Comunicación e relación co/a TA e co/a TP.
   6. Cumprimento dos prazos e requisitos formais establecidos pola CPE.
   7. Calidade da presentación oral e uso axeitado de recursos de apoio.
   8. Defensa final ante o/a TA, evidenciando autoría e comprensión global da experiencia.
   9. Actitude profesional e ética, conforme aos valores institucionais de igualdade, respecto, diversidade e integridade.
4. Os indicadores e niveis de desempeño específicos de cada criterio recóllense nas rúbricas oficiais de avaliación incluídas nos Anexos III e IV.
5. A presentación e defensa oral da memoria de prácticas será obrigatoria, e deberá ser dirixida polo/a TA co obxecto de verificar o grao de adquisición das competencias profesionais e a autoría do traballo presentado.
   A defensa realizarase de forma presencial ou telemática, e será avaliada conforme aos criterios correspondentes da rúbrica oficial (presentación, uso de recursos e defensa final).
6. O incumprimento dos prazos e formas de entrega establecidos pola CPE poderá implicar unha penalización de ata o 20% da cualificación final, salvo causa xustificada e debidamente acreditada.

IV.4. Instrumentos e documentación de avaliación

1. Empregarase a seguinte documentación oficial, de uso obrigatorio:
   1. Rúbrica de avaliación do/a TP (Anexo III).
   2. Rúbrica de avaliación do/a TA (Anexo IV).
   3. Memoria de prácticas do estudantado.
   4. Enquisas de satisfacción das tres partes implicadas (estudante, TP e TA).
   5. Informe resumo anual da CPE (para mellora continua).
2. Toda a documentación presentarase a través de TELMO ou doutros medios oficiais designados pola ETSNM, dentro dos prazos establecidos, e deberá estar asinada ou validada por quen corresponda.

IV.5. Ponderación das avaliacións

1. A cualificación final resultará da seguinte ponderación:
   1. TP: 60%
   2. TA: 40%
2. Estes pesos poderán adaptarse motivadamente pola CPE en función da natureza das prácticas, con comunicación previa ao estudantado.
3. A avaliación do/a TP valorará o desempeño, a actitude e o grao de cumprimento das tarefas.
4. A avaliación do/a TA valorará a adecuación ao proxecto formativo da memoria de prácticas (documento, presentación e defensa).
5. Se o/a estudante non entrega a memoria, non cumpre coas obrigas formais ou non completa o número mínimo de horas, a cualificación será Suspenso (0,0).

IV.6. Escala de cualificacións

1. A cualificación final expresarase nunha escala de 0 a 10, con denominación cualitativa:
   • 0,0–4,9: Suspenso (SS)
   • 5,0–6,9: Aprobado (AP)
   • 7,0–8,9: Notable (NT)
   • 9,0–10: Sobresaínte (SB)
2. A Matrícula de Honra poderá ser proposta polo/a TA, con informe motivado e aprobación pola CPE, de acordo coa normativa da UDC.

IV.7. Revisión e reclamacións

1. O estudantado poderá solicitar revisión da cualificación final ante o/a TA no prazo de 48 horas dende a publicación oficial.
2. No caso de persistir discrepancia coa avaliación final publicada, o/a estudante poderá presentar recurso ante a Dirección da ETSNM, segundo o procedemento xeral de avaliación, revisión e reclamación das cualificacións da UDC.

IV.8. Integración para a mellora continua

1. A CPE incorporará aos seus informes anuais datos agregados de resultados e satisfacción das prácticas, co fin de alimentar a mellora continua do proceso.
2. Estes informes poderán fundamentar axustes nas rúbricas, procedementos ou criterios, que serán aprobados pola CPE e comunicados á Xunta de Escola cando proceda.

V.1. Seguimiento anual das prácticas

1. A CPE é o órgano responsable do seguimento anual das prácticas externas, co obxectivo de garantir a súa correcta planificación, execución e avaliación.
2. Para o seguimento, a CPE recollerá e analizará a información procedente de:
   1. As rúbricas de avaliación do/a TA e do/a TP.
   2. As enquisas de satisfacción do estudantado, das empresas e do persoal titor.
   3. O número de convenios asinados, prazas ofertadas e prazas cubertas.
   4. As incidencias rexistradas durante o desenvolvemento das prácticas.
   5. As propostas de mellora formuladas polos/as titores/as e polo estudantado.
3. A CPE poderá convocar reunións de avaliación con TA e TP, así como encontros de boas prácticas coas empresas colaboradoras.
4. Co fin de facilitar a trazabilidade, toda a documentación de seguimento conservarase segundo o procedemento de arquivo e rexistro establecido pola ETSNM.

V.2. Informe anual de resultados

1. Ao remate de cada curso académico, a CPE elaborará un Informe anual de resultados das prácticas externas, que deberá incluír, como mínimo:
   1. Datos estatísticos de participación, distribución por titulación e tipo de práctica.
   2. Taxa de superación e cualificacións medias.
   3. Grao de satisfacción das partes implicadas.
   4. Relación de empresas colaboradoras e valoración global.
   5. Incidencias significativas e resolución adoptada.
   6. Propostas de mellora para o seguinte curso académico.
2. O informe será presentado á Dirección da ETSNM e á Xunta de Escola, e quedará dispoñible para consulta do persoal docente e de xestión vinculado ao programa de prácticas.
3. A información contida neste informe servirá para tomar decisións de planificación e mellora nas edicións posteriores.

V.3. Mellora continua e actualización do Regulamento

1. O proceso de mellora continua das prácticas externas fundamentarase nos resultados do informe anual e nas avaliacións recollidas pola CPE.
2. As propostas de mellora poderán referirse a calquera dos seguintes ámbitos:
   1. Captación e fidelización de empresas colaboradoras.
   2. Actualización dos modelos de documentación e rúbricas de avaliación.
   3. Mellora da coordinación entre TA, TP e estudantado.
   4. Incorporación de novas ferramentas dixitais para xestión e seguimento.
   5. Formación específica para titores/as e estudantes.
3. As actualizacións do Regulamento de Prácticas Externas serán aprobadas pola Xunta de Escola da ETSNM, por proposta da CPE, e entrarán en vigor no curso académico seguinte á súa aprobación.

V.4. Coordinación co Sistema de Calidade

1. A CPE manterá comunicación periódica coa Comisión de Calidade da ETSNM, co fin de integrar os resultados do seguimento de prácticas no Informe Anual de Calidade do Centro.
2. Os indicadores relacionados coas prácticas externas formarán parte dos indicadores de rendemento e satisfacción do Sistema Interno de Garantía de Calidade da Escola.
3. A información agregada sobre prácticas externas poderá ser empregada para procesos de acreditación, seguimento e renovación de títulos ante organismos externos.