A Coruña, 28 de maio de 2019.- O xurado dos Premios de Investigación Científica Informática de España e a Fundación BBVA decidiu onte entregar un dos Premios Nacionais de Informática á catedrática de Linguaxes e sistemas informáticos, do departamento de Computación da Universidade da Coruña, Nieves Rodríguez Brisaboa.

A catedrática da UDC recibirá o Premio Ángela Ruiz Robles “polos seus traballos de investigación e innovación relacionados coa Xestión de Datos, así como polas súas iniciativas nos campos da transferencia de coñecemento en relación con empresas e institucións públicas, así como a creación de empresas de base tecnolóxica”.

O xurado distinguiu tamén cos Premios Nacionais de Informática ao catedrático de Ciencias da Computación e Intelixencia Artificial da Universidade Pública de Navarra, Humberto Bustince Sola, ao catedrático de Ciencias da Computación e Intelixencia Artificial da Universidade Rey Juan Carlos, Antonio Fernández Anta, e a Homeria Open Solutions, S.L. ademais de fallar onte os premios aos Novos Investigadores Informáticos.

Nieves Rodríguez Brisaboa, catedrática de Linguaxes e sistemas informáticos, do Departamento de Computación da Facultade de Informática da Universidade da Coruña é coordinadora do grupo de investigación Laboratorio de Bases de Datos. Entre outros resultados deste grupo destaca a implementación dun prototipo de ferramenta para comercio electrónico, así como outros resultados no marco das bibliotecas dixitais e dos sistemas de información xeográfica. Algúns dos resultados de investigación deste grupo transferíronse á industria  a través dunha spin off. A catedrática ten unha longa traxectoria como investigadora, con sete libros, 88 artigos científicos e 81 proxectos de I+D+i, ademais de participar en tres patentes de investigación.

Éste é o segundo Premio Nacional de Informática que consegue a Universidade da Coruña. Na edición do ano pasado distinguiuse con este galardón ao catedrático Ramón Doallo Biempica. Nesa mesma edición, o investigador da UDC David Vilares Calvo recibiu un dos Premios Novos Investigadores Informáticos.