A Coruña, 10 de outubro de 2025.- O vindeiro luns, día 13 de outubro, ás 17:00 horas, terá lugar na Capela do Balneario de Arteixo a inauguración da nova edición do Programa de Democratización do Coñecemento, impulsado pola Universidade Sénior da Universidade da Coruña e dirixido a persoas maiores de 50 anos de Arteixo. Na presente edición, preto de 70 participantes formarán parte desta iniciativa educativa.

A Universidade Sénior, o programa universitario para maiores de 50 anos da Universidade da Coruña, pon en marcha neste 2025 a 4ª edición deste Programa de Formación Universitaria Específico para Adultos Maiores, grazas ao financiamento da Xunta de Galicia e coa colaboración do Concello de Arteixo. O programa desenvolverase entre os meses de outubro e novembro na Capela do Balneario de Arteixo. Nesta edición, participarán 68 persoas.

O acto de inauguración contará coa presenza da directora da Universidade Sénior, Matilde García Sánchez, e da concelleira de Igualdade, Servizos Sociais, Sanidade e Educación, Inés Ramos Álvarez.

O programa consta de tres módulos temáticos, con sesións teóricas impartidas por profesorado da Universidade da Coruña, dúas veces por semana. Os módulos abordarán diversas áreas de coñecemento:

MÓDULO I: HUMANIDADES E CIENCIAS SOCIAIS

• 13 de outubro: “A Dirección Artística no Cine”, Profa. Victoria de León Sanjuán
• 14 de outubro: “A xestión do común: Unha visión desde a economía e os comics”, Prof. Manuel Gómez Suárez
• 23 de outubro: “Literaturas do Mundo: unha viaxe á orixe dos libros”, Profa. Elena Martín Cancela

MÓDULO II: CIENCIAS DA TERRA E TECNOLOXÍA

• 27 de outubro: “(Bio)invasións en Galicia: mecanismo, impacto e xestion”, Prof. Sergio Rodríguez Roiloa
• 28 de outubro: “ADN Antigo e Evolución Humana: unha viaxe ao pasado a través dos nosos xenes”, Profa. Gloria Mª González Fortes
• 3 de novembro: “Descubrindo a Intelixencia Artificial: retos, aplicacións e ferramentas”, Prof. Álvaro Michelena Grandío

MÓDULO III: CIENCIAS DA VIDA E DA SAÚDE

• 10 de novembro: “O cambio climático: causas e consecuencias”. Prof. Salvador Fojón Polanco
• 11 de novembro: “Enfermidades cardiovasculares e Diabetes”, Prof. Luis Saleta Canosa
• 17 de novembro: “Boas Prácticas para o Coidado do Benestar Psicolóxico”, Prof. Carlos Freire Rodríguez

Clausura e xornada cultural na Coruña

O Programa formativo rematará cunha xornada de visitas académicas e culturais na Coruña, onde terá lugar o acto de clausura e entrega de diplomas, o día 19 de novembro de 2025.

Con este Programa, a Universidade Sénior achégase un ano máis ás persoas maiores de 50 anos de Arteixo e maila súa comarca, coa intención de seguir dando resposta as súas inquedanzas e necesidades formativas como ven facendo en diferentes localidades e comarcas deste o ano 2018.