• O investigador recibiu un recoñecemento polas súas achegas á estatística e á cooperación internacional. A súa colaboración en CLATSE reforza a alianza académica entre Europa e América Latina. 

• O catedrático da UDC reivindicou no seu relatorio unha formación integral para afrontar os retos éticos e tecnolóxicos do novo paradigma dos datos.

A Coruña, 28 de outubro de 2025.- O investigador do CITIC Salvador Naya Fernández, catedrático de Estatística e Investigación Operativa da Universidade da Coruña (UDC), participou recentemente no XVII Congreso Latinoamericano de Sociedades de Estatística (CLATSE), celebrado en Quito, Ecuador, onde destacou o cambio de paradigma que vive actualmente a estatística e reforzou a colaboración académica entre Europa e América Latina.

O CLATSE constitúe un espazo histórico de intercambio académico e profesional no ámbito da estatística, que se celebra desde finais dos anos 80 e que tivo como sedes anteriores a países como Arxentina, Chile, Uruguai, México, Colombia e Perú. Nesta edición, Ecuador sumouse por primeira vez como anfitrión, consolidando o seu papel na comunidade estatística internacional. O congreso incluíu conferencias maxistrais, cursos especializados, relatorios e mesas de debate, ademais do XIII Seminario Internacional de Estatística Aplicada, organizado pola Sociedade Ecuatoriana de Estatística.

Durante a súa intervención, Salvador Naya abordou o profundo cambio de paradigma da estatística nas últimas décadas. Explicou como a disciplina evolucionou desde o seu enfoque clásico cara a unha visión transversal e interdisciplinar, impulsada polo Big Data, a intelixencia artificial e os sistemas automatizados de decisión.

“Hoxe, a estatística non só describe e modela a realidade: transfórmaa. Enfrontámonos a un novo ecosistema de datos masivos, algoritmos intelixentes e decisións automatizadas, onde o papel do estatístico é máis relevante que nunca”, afirmou Naya.

O investigador subliñou, ademais, a importancia da formación integral que combine fundamentos matemáticos, competencias computacionais e principios éticos, para afrontar os desafíos dun mundo interconectado e guiado polos datos. Na súa intervención tamén destacou o valor do CLATSE como plataforma estratéxica de encontro e cooperación entre investigadores, profesionais e estudantes de toda América Latina:

“Este congreso é unha plataforma esencial para fortalecer a comunidade estatística latinoamericana, compartir experiencias e construír solucións conxuntas aos retos sociais, económicos e ambientais da nosa rexión.”

Recoñecemento na EPN e colaboración institucional

Coincidindo coa súa estancia en Ecuador, Salvador Naya foi convidado a participar na cerimonia de conmemoración dos 50 anos do Grao de Matemática da Escola Politécnica Nacional (EPN). Neste acto, abriu a xornada coa conferencia titulada “Da Liña do Ecuador á liña de produción: Historia e futuro da medida”, na que percorreu a evolución da metroloxía desde a soada expedición xeodésica ao Ecuador, ata os actuais procesos de control dimensional e calibración na Industria 5.0.

Durante a cerimonia, o profesor Naya recibiu un recoñecemento especial polas súas achegas ao campo da estatística, destacando máis dunha década de contribucións científicas e académicas que fortaleceron a cooperación entre Europa e América Latina.

Conferencia na ESPE: ciencia, defensa e innovación

Ademais, o investigador do CITIC aproveitou a súa estancia en Quito para visitar a Escola Politécnica das Forzas Armadas (ESPE), onde impartiu a conferencia “Defensa e Innovación: Sinerxías entre Universidade, Industria e Estado”. Nela, presentou experiencias de colaboración público-privada en proxectos estratéxicos como o Centro Mixto de Investigación UDC-Navantia (CEMI) e o proxecto europeo EDINAF, que promoven a transferencia de coñecemento e a innovación aplicada no ámbito da defensa e a industria tecnolóxica.

Sobre o CITIC

O CITIC é un centro de investigación que potencia o avance e a excelencia en I+D+i aplicada ás TIC, creado en 2008 pola Universidade da Coruña. A actividade científica do centro estrutúrase en catro áreas principais de investigación: Intelixencia Artificial, Ciencia e Enxeñaría de Datos, Computación de Altas Prestacións e Servizos e Redes Intelixentes, así como unha área transversal: a de Ciberseguridade.

O CITIC está acreditado como Centro de Excelencia e membro da Rede CIGUS para o período 2024-2027, o que avala a calidade e o impacto da súa investigación. A acreditación, estruturación e mellora do CITIC está cofinanciada pola Xunta de Galicia e nun 60 % pola Unión Europea no marco do Programa Operativo FEDER Galicia 2021-2027, co obxectivo temático de promover “unha Europa máis intelixente: transformación económica innovadora e intelixente” (ED431G 2023/01).