A UDC, no seu Plan Estratéxico 2022-2026, aposta polo fomento da investigación de calidade e o desenvolvemento dunha carreira investigadora sólida. Con ese obxectivo, establecéronse políticas orientadas á atracción e retención de talento en todas as etapas da carreira investigadora, creando un entorno propicio para o crecemento profesional e o avance científico.

Dentro desas políticas enmárcase o programa berce (benvida, estabilización e retorno da ciencia excelente), que botou a andar en 2016. Berce establece as condicións necesarias para que o persoal investigador atope na UDC unha contorna favorable para realizar a sua investigación de excelencia. A través dunha serie de medidas e servizos de apoio, céntrase en tres piares: darlles a benvida e integrar na UDC investigadores e investigadoras internacionais, ofrecer opcións de estabilización laboral con condicións económicas moi competitivas e facilitar o retorno do talento que leva a cabo a súa actividade no estranxeiro. Desde a súa creación, o Programa Berce brindou os seus servizos a máis de 70 investigadores e investigadoras.