A Coruña, 20 de febreiro de 2026

A Universidade da Coruña e a empresa Gabadi, con sede en Narón, únense para crear a Cátedra Gabadi-UDC. Unha alianza coa que institución académica e empresa buscan tres obxectivos estratéxicos: posicionar a Galicia como referente na habilitación de mega iates e cruceiros e fortalecer o nivel formativo da rexión neste eido; impulsar a innovación e transferencia en interiorismo naval  e establecer unha rede estable entre universidade e empresas do sector marítimo.

Así quedou reflectido no acordo asinado hoxe entre o reitor da UDC, Ricardo Cao, e o CEO de Gabadi, Antonio José Llago Hermida, nun acto de firma celebrado hoxe no Campus Industrial de Ferrol. Un acto que contou tamén coa presenza da vicerreitora do Campus de Ferrol e Responsabilidade Social, Ana Ares e o director do Campus Industrial, Marcos Míguez.

No marco da cátedra promoveranse actividades de formación relacionadas coa habilitación naval de alta gama, desenvolvendo programas formativos orientados á habilitación de mega iates e cruceiros, integrando deseño, sustentabilidade e normativa internacional.

Contribuirase así mesmo á formación práctica do estudantado mediante practicas curriculares e extracurriculares en diferentes proxectos reais de habilitación naval. Tamén se promoverán premios e concursos para o talento mozo.

Outro dos eidos de traballo desta cátedra será o fomento da innovación aplicada ao sector naval mediante proxectos de investigación, desenvolvemento e innovación de materiais. Impulsarase tamén a presenza en feiras e encontros de carácter internacional co fin de posicionar a Galicia neste sector.

Para o reitor da UDC, Ricardo Cao, esta cátedra supón “un paso máis na estratexia da Universidade da Coruña por reforzar a colaboración coa contorna produtiva e contribuír activamente ao desenvolvemento económico e industrial de Galicia”.

A colaboración con Gabadi, empresa naronesa con forte implantación internacional “reforza o papel da UDC como axente de transferencia de coñecemento e motor de talento cualificado, neste caso da man dun referente nun sector con grande proxección de futuro”.

Pola súa banda, o CEO de Gabadi, Antonio José Llago Hermida, destacou que “esta colaboración coa Universidade da Coruña representa unha aposta decidida polo talento e pola especialización do futuro do noso sector. En Gabadi cremos firmemente na importancia de tender pontes entre empresa e universidade para impulsar a innovación e garantir profesionais altamente cualificados”.

Así mesmo, subliñou “o valor estratéxico de sumar esforzos con institucións como o Campus Industrial de Ferrol da UDC, un ecosistema clave para fortalecer a competitividade do naval galego e consolidar a Galicia como referente internacional en habilitación e interiorismo naval”.

Para o desenvolvemento de todo o plan de actuación, prevese un investimento anual de 20.000 euros. A dirección da cátedra correrá a cargo de Lucia Santiago Caamaño, profesora e investigadora do Grupo Integrado de Enxeñaría, adscrito ao CITENI. 

Sobre Gabadi

Gabadi é unha empresa do sector naval con máis de 35 anos de traxectoria.  Con sede en Narón (A Coruña), está dedicada á habilitación naval para o sector militar e civil, incluíndo barcos de servizos (oceanográficos), de recreo e de turismo, como iates e cruceiros. Tamén fabrican tanques de terra e barcos para o transporte de gas natural licuado. Ten filiais en China e Canadá.

Publicado por: Vicerreitoría de Estudantes e Empregabilidade

A Coruña, 20 de febreiro de 2026

A Universidade da Coruña (UDC) vén de acadar tres proxectos financiados na convocatoria 2025 das Marie Skłodowska-Curie Postdoctoral Fellowships (MSCA-PF), unha das axudas máis prestixiosas e competitivas do programa Horizonte Europa para a captación de talento investigador posdoutoral a nivel internacional.

O Centro Interdisciplinar de Química e Bioloxía (CICA) acollerá a dous dos investigadores seleccionados, Yaxue He e Jesús Castro, quen se incorporarán ao centro de investigación da UDC durante os dous próximos anos baixo a supervisión de Christian Kennes e Alejandro Criado respectivamente para levar a cabo os seus proxectos. A terceira incorporación será no Centro de Investigación en Tecnoloxías Navais e Industriais (CITENI), que acollerá ao investigador Youhua Yang baixo a supervisión do investigador Oportunius  Diego Martínez.

As MSCA Postdoctoral Fellowships  son bolsas orientadas a apoiar persoal investigador excelente en fases temperás da súa carreira posdoutoral, fomentando a mobilidade internacional, o desenvolvemento de competencias avanzadas e a consolidación de traxectorias científicas independentes. Ao mesmo tempo, reforzan as capacidades científicas e a proxección internacional dos grupos de investigación de acollida. Estes resultados sitúan á Universidade da Coruña nunca posición destacada no contexto estatal, tendo en conta a gran dificultade da convocatoria, cunha taxa de éxito global por debaixo do 10%.

Un resultado froito dunha estratexia institucional sostida

O éxito acadado nesta convocatoria é resultado dunha estratexia institucional de reforzo da internacionalización e da excelencia científica, articulada a través da Oficina de Captación de Persoal Investigador (OCPI), en coordinación cos distintos centros e grupos de investigación da universidade. Esta planificación permite identificar talento con antelación, acompañar de maneira personalizada a preparación das propostas e fortalecer os perfís de supervisión internacional da UDC.

PFAScan, do investigador Jesús Castro

O investigador Jesús Castro levará a cabo no CICA un proxecto orientado ao desenvolvemento dunha nova tecnoloxía para a detección de substancias perfluoroalquiladas e polifluoroalquiladas (PFAS) en auga.

Estes compostos son uns contaminantes moi persistentes e perigosos e representan unha ameaza a longo prazo para a saúde pública e os ecosistemas. A investigación de Jesús Castro propón o deseño de sensores baseados en grafeno, capaces de detectar PFAS de maneira rápida e directa desde o propio punto de análise. Esta tecnoloxía permitirá a monitorización continua da calidade da auga e a creación de sistemas de alerta temperá, reforzando a seguridade ambiental e o cumprimento da normativa europea.

O proxecto desenvolverase baixo a supervisión de Alejandro Criado e co apoio de Jesús Mosquera, investigadores do grupo de Autoensamblaxe Molecular e Nanomateriais (NanoSelf) do CICA.

C1Bio-Nano, de Yaxue He

C1Bio-Nano, da investigadora postdoutoral Yaxue He, ten como obxectivo transformar gases industriais como o CO e o CO₂, responsables do cambio climático, en compostos químicos de valor engadido. A proposta combina bacterias capaces de fixar estes gases con nanopartículas xeradas bioloxicamente que melloran a transferencia de enerxía entre microorganismos, aumentando así a eficiencia do proceso.

O obxectivo final é producir ácidos carboxílicos de cadea media, substancias con múltiples aplicacións industriais que poden substituír derivados do petróleo. Este enfoque permitiría reducir emisións e, ao mesmo tempo, impulsar unha economía circular baseada na valorización sostible do carbono.

O proxecto desenvolverase baixo a supervisión de Christian Kennes co apoio de María del Carmen Veiga, investigadores do grupo de Bioenxeñería Ambiental e Control de Calidade (Bioengin) do CICA.

FOUNDRY, de Youhua Yang

O proxecto FOUNDRY centrarase no estudo de decaementos raros de partículas subatómicas no experimento LHCb do CERN, co obxectivo de realizar medicións pioneiras que permitan poñer a proba o Modelo Estándar da física de partículas.

A investigación desenvolverá ferramentas avanzadas de análise de datos para mellorar a precisión das medicións e situará á UDC na vangarda dun campo altamente especializado. Ademais de reforzar a participación da universidade nunha das maiores infraestruturas científicas internacionais, o proxecto consolidará a súa posición como referente na análise de decaementos raros e no desenvolvemento de técnicas avanzadas de identificación de partículas.Este proxecto contará coa supervisión do investigador Diego Martínez, do CITENI.

Mirando cara ao futuro

A UDC continuará reforzando esta liña de traballo de cara á convocatoria MSCA-PF 2026, que abrirá oficialmente na primavera, consolidando os mecanismos de detección temperá de talento, apoio estratéxico á preparación de propostas e visibilización internacional dos perfís de supervisión da universidade.

Estes resultados confirman o potencial da Universidade da Coruña para competir con éxito nun dos programas máis esixentes do panorama europeo de I+D+i e reflicten o compromiso institucional coa captación de talento, a excelencia científica e a internacionalización.

Esperamos que sexa do agrado de todo o persoal investigador da UDC.