Traballar e investigar na UDC
TRABALLAR NA UDC
A Universidade da Coruña foi creada en 1989. É unha institución pública cuxo obxectivo principal é xerar, xestionar e difundir cultura e coñecemento científico, tecnolóxico e profesional a través do ensino e do desenvolvemento da investigación básica e aplicada que contribúan ao progreso científico, tecnolóxico, económico e social. É unha institución moderna, innovadora e dinámica que está fortemente comprometida coa educación integral dos seus estudantes: á ampla e sólida oferta académica únense programas culturais, de cooperación, igualdade, de lecer, deportivos, entre outros.
Estrutúrase en dous campus: o da Coruña e o de Ferrol, con diferentes titulacións en cada un deles, e radicados en dúas estupendas cidades ao carón do mar.
A Universidade da Coruña considera prioritaria a súa internacionalización. A través dos diferentes programas internacionais que ofrece impúlsase a mobilidade internacional da comunidade universitaria como experiencia académica, o cal se complementa coa crecente presenza de estudantado estranxeiro nos nosos campus universitarios. Máis de 500 estudantes e investigadores internacionais visitan anualmente a UDC creando un ambiente internacional plural e aberto, enriquecido coa nosa cultura e lingua. Ademais, a UDC está inmersa no proceso de implantación dunha oferta estable de cursos e materias ofrecidos en inglés. Unha oferta plurilingüe que aumenta o seu atractivo para o estudantado e profesorado estranxeiro e supón un valor curricular engadido para o estudantado propio. A UDC impulsa a colaboración con outras institucións para ofrecer titulacións conxuntas e dobres titulacións internacionais, tanto con países do espazo do EEES como con outras áreas estratéxicas.
Ligazóns útiles
Portal de persoal: onde podes consultar o teu calendario laboral, as túas ausencias e solicitudes:
AxudaTIC: portal para consulta de temas relacionados coas TIC na UDC, así como para poñer incidencias.
Portafirmas: ferramenta interna de sinatura de solicitudes e documentación. Accede coas túas credenciais a través desta ligazón:
Manual de benvida (pendente de actualización):
https://www.youtube.com/watch?v=EqjjwLMeJZo
INVESTIGAR NA UDC
Conta de correo e tarxeta identificativa:
Ao inicio do teu contrato, crearase e darase de alta unha conta de correo electrónico. Tamén deberás solicitar a túa tarxeta identificativa universitaria que che dará acceso aos edificios nos que traballas. Para a emisión da túa tarxeta, debes pedir cita co Servizo de Informática e Comunicacións (SIC) que se atopa no Edificio de Servizos Centrais da Investigación (ESCI).
Servizo PDI: páxina dedicada ao persoal docente e investigador:
Servizo de Investigación (SERIN): é o encargado da xestión administrativa da actividade de I+D+i dentro da UDC.
Equipo de xestión da investigación (EXI): xestión económica de proxectos e convenios de investigación autonómicos, nacionais e europeos:
https://udc.es/gl/investigacion/Cofinancia_FEDER/
Oficina de Transferencia do Coñecemento (OTC): servizos especializados en transferencia de coñecemento, innovación, creación de spin-off, valoración e protección dos resultados (patentes).
Oficina de Proxectos Internacionais (OPI): xestión administrativo- económica de proxectos e programas europeos de investigación.
Oficina de Captación de Persoal Investigador (OCPI): asesoramento e apoio personalizado na detección de convocatorias e oportunidades de financiamento públicas. Revisión de propostas e solicitudes a convocatorias nacionais e europeas.
Servizos de Apoio á Investigación (SAI): conxunto de servizos especializados capaces de prestaren apoio á investigación científica, técnica e humanística, e cunha dotación instrumental, técnica e de recursos humanos que, ben polas súas características propias ben polo ámbito da súa aplicación, superan as necesidades dun centro, departamento ou instituto universitario.
Servizos da UDC
TRANSPORTE
Para chegar aos campus da Coruña
- Para chegar ao campus de Elviña o ao da Zapateira podes coller o autobús da liña UDC, que ten inicio e fin na praza de Pontevedra. Tamén podes chegar a Elviña coas liñas 20, 22 e 24, e con esta última tamén á Zapateira.
- O campus de Oza está xunto ao complexo hospitalario de Oza e podes chegar con as liña 2-A, liña 12-A, liña 12, liña 17, liña 20e liña 22
- O campus de Riazor está xunto á praia do mesmo nome e podes chegar alí con múltiples liñas de autobús: liña 3-A, liña 3, liña 5, liña 7, liña 12-A, liña 12, liña 14, liña 21, liña 23-Ae liña 23
- O campus de Bastiagueiro está situado no concello de Oleiros. Podes chegar coas liñas de autobús liña A Coruña - Rialtae liña A Coruña - Sada
Para chegar ao campus de Ferrol:
- Para chegar ao campus de Ferrol (campus de Esteiro e campus de Serantes podes utilizar os autobuses da empresa Alsa. Preme na ligazón para ver toda a información:
ESCOLAS INFANTÍS
O Campus de Elviña conta cunha escola infantil 0-3 anos xestionada pola empresa “Os Pequerrechos” que está situada xunto á Facultade de Ciencias da Educación. Esta escola presta servizo gratuíto aos fillos/as de calquera persoa da comunidade universitaria, xa sexa estudante, persoal de administración e servizos ou persoal docente e investigador. Ademais, as persoas interesadas poden solicitar unha axuda para custear os gastos do comedor escolar. Estas axudas convócanse anualmente no mes de abril-maio e publícanse no taboleiro de anuncios da sede electrónica da universidade.
https://sede.udc.gal/services/electronic_board
Podes ver a información da convocatoria anterior no apartado de Acción Social da web da UDC:
O campus de Ferrol non conta cunha escola infantil propia, pero ten convenio con escolas da zona. A estas axudas pódese acceder na mesma convocatoria que na dirixida á escola infantil de Elviña.
ACTIVIDADES DEPORTIVAS
Toda a comunidade universitaria pode acceder ás instalacións deportivas da universidade a través dun abono que ten un custo de 30 € por curso académico.
https://www.udc.es/gl/deportes/abono_deporte/
Ademais, desde a UDC ofrécese unha gran variedade de actividades deportivas dirixidas cuxo período de inscrición adoita ser ao inicio de cada cuadrimestre.
https://www.udc.es/es/deportes/actividades_deportes/
CENTRO DE LINGUAS
A UDC conta cun centro de linguas que ofrece varios cursos en modalidades en liña e presencial dirixidos a toda a comunidade universitaria.
Podes consultar os idiomas ofertados, así como horarios dos cursos, prezos etc. Na súa páxina web:
http://www.centrodelinguas.gal/
OFICINA DE RELACIÓNS INTERNACIONAIS (ORI)
A Oficina de Relacións Internacionais (ORI) enfócase principalmente na comunidade estudantil, aínda que tamén xestiona algúns programas de mobilidade de persoal académico, administrativo e de investigación (investigadores/as visitantes).
UDC SAUDABLE
Servizo dependente da Vicerreitoría do Campus de Ferrol e Responsabilidade Social. A súa función é participar na coordinación e realización de diferentes accións de vida saudable na comunidade universitaria con proxección social: actividade física e deporte, actividade ocupacional, rutinas cotiás, lecer e tempo libre, alimentación saudable, benestar psicosocial, sono e descanso, saúde sexual, accións contra o uso e abuso de alcohol, tabaco, drogas e outras adiccións, inclusión saudable das persoas con diversidade, fraxilidade nas persoas (infancia, maiores, enfermidades), orientación pedagóxica, entre outros aspectos; en sintonía colaborativa transversal co desenvolvemento sostible na UDC.
https://www.udc.es/gl/udcsaudable/
PROGRAMA AFRONTEMOS:
No campus de Ferrol atópase a sede do Programa Afrontemos desde o que se ofrece atención psicolóxica á comunidade universitaria (hai que concertar cita).
ESTRATEXIA HRS4R
Como parte do compromiso de atraer o mellor talento investigador, a Universidade da Coruña en agosto de 2016 adheriuse á Carta europea de investigadores e ao Código de conduta para a contratación de investigadores, que establece os dereitos e obrigas do persoal investigador e das institucións empregadoras e financiadoras co fin de aplicar procedementos de contratación transparentes e xustos.
O logo "HR Excellence in Research" ofrece recoñecemento público ás institucións de investigación que avanzaron na alineación das súas políticas de recursos humanos cos principios definidos na "Carta e no Código" (Charter & Code). As institucións xa recoñecidas teñen o dereito a usar o logo para resaltar o seu compromiso de implementar procedementos transparentes de contratación e avaliación de investigadores.
Actualmente a UDC traballa na implementación das medidas recollidas no Plan de Acción 2022-2025.