O profesor da ETS Náutica e Máquinas José Vidal presenta a súa tese doutoral centrada no uso de SIG para tratar datos hidrometeorolóxicos en Galicia
O profesor da ETS de Náutica e Máquinas da Universidade da Coruña José Vidal Paz defendeu, o venres 15 de novembro, a súa tese doutoral titulada “Sistemas de Información Xeográfica para o tratamento de datos hidrometeorolóxicos en Galicia”. A obtención deste título reflicte a súa dedicación e esforzo no campo da enxeñería de computadores e as tecnoloxías da información.
A tese de Vidal aborda o uso de Sistemas de Información Xeográfica (SIX) para a análise e tratamento de datos hidrometeorolóxicos en Galicia, contribuíndo significativamente ao coñecemento e manexo destes datos cruciais para a xestión ambiental e a planificación territorial.
Nos últimos anos, desenvolveuse unha extensa rede de estacións meteorolóxicas automáticas en Galicia. Identificouse a necesidade de crear un SIX capaz de descargar datos meteorolóxicos desta rede e almacenalos nunha base de datos pública. Esta ferramenta é esencial para enxeñeiros/as e científicos/as no deseño de infraestruturas e no aproveitamento de recursos naturais. Con todo, os datos incompletos poden levar a inferencias erróneas, polo que se desenvolveron algoritmos para analizar e completar as series temporais de datos.
A tese propón un método de validación para comparar diferentes métodos estatísticos de imputación, seleccionando o máis efectivo para xerar series temporais completas de datos meteorolóxicos. A partir desta base de datos, desenvolvéronse algoritmos para crear curvas IDF e outras capas vectoriais con información meteorolóxica.