Bicis e Mobilidade

Bicis na UDC

Programa de préstamo de bicicletas na UDC

Ábrese a convocatoria de préstamo de bicicletas da UDC para o Curso 2025/2026.

Prazo de solicitude: do 10 ao 20 de setembro

O obxectivo deste programa é o de promover o emprego da bicicleta como vehículo para a mobilidade sustentable, facilitando o acceso a unha bicicleta a aquelas persoas interesadas en facer uso da mesma para desprazarse aos centros universitarios.

O uso da bicicleta como medio de transporte reduce a conxestión do tráfico, mellora a calidade ambiental nas cidades, contribúe a reducir as emisións de gases de efecto invernadoiro, e mellora a saúde das persoas que fan uso delas.

O parque de bicicletas da UDC conta cunhas 100 unidades de cinco modelos diferentes: CARACTERÍSTICAS DAS BICICLETAS DA UDC. As persoas interesadas teñen a posibilidade de elixir entre:

Bicicletas convencionais: Modelos Gotty Alegre (28”, 21 velocidades) e Gotty Top26 (26”, 6 velocidades). Taxas: 10€ para alumnado, 20€ persoal PTXAS, PDI, PEC.
Bicicletas pregables: Modelos Conor Autumn (20”, 8 velocidades) e Conor Denver (20”, 6 velocidades). Taxas: 20€ para alumnado, 40€ persoal PTXAS, PDI, PEC.
Bicicletas eléctricas: Modelo SK8 URBAN BEETLE (16”, 5 niveis de asistencia ao pedaleo). Taxas: 50€ para alumnado, 90€ persoal PTXAS, PDI, PEC.

Taxas: Aboaranse a través da pasarela de pago telemático UDC XEST. Unha vez feito o pagamento, a persoa será adxudicataria da bicicleta e recibirá as instrucións para recollida no seu correo-e persoal da UDC.

Texto completo da convocatoria: CONVOCATORIA PRÉSTAMO BICICLETAS UDC PARA O CURSO 2025/2026 (LECTURA IMPORTANTE: condicións do préstamo, período, taxas...)

Todas as consultas sobre a convocatoria poderán facerse a través de bicis@udc.gal.

Publicacións e informes sobre Bicis

Informes de avaliación do Servizo de préstamo de bicicletas

Circulación en bicicleta, como acceder á UDC. Deseño de itinerarios para o acceso en bicicleta a UDC, realizados pola Asociación Mobi-Liza no ano 2020. Mostran a información sobre a circulación pola cidade da Coruña e o acceso aos Campus de forma segura para os membros da comunidade universitaria que desexen usar a bicicleta para os seus desprazamentos:
Somos tráfico: pequena guía do uso da bicicleta como medio de transporte. Esta guía informa sobre medidas de seguridade e outros consellos para desprazarse polas cidades: como circular entre os coches, que posición adoptar na calzada e á saída dos semáforos, ou cales son os equipamentos básicos (luz, timbre, reflectante, etc.)

Panel: 10 motivos para andar en bici. O panel mostra brevemente 10 beneficios de andar en bicicleta: Engánchate aos pedais e comproba os beneficios para a saúde e o ambiente.

Mobilidade

Publicacións e informes sobre Mobilidade

Mobilidade en avión: Recomendacións para a elaboración de políticas de viaxes sustentábeis nas universidades

A OMA publica o resumo-presentación de elaboración propia a partir do informe de CRUE Sostenibilidad do ano 2022 co mesmo título, que ten o obxectivo de facilitar a toma de conciencia nas universidades sobre a problemática asociada a mobilidade en avión, e ademais, que a partir desta concienciación, se dispoña de recomendacións para orientar e facer posíbel regular esta actividade a nivel institucional.

Informe completo CRUE Sostenibilidad (Esp.): Recomendaciones para la elaboración de políticas de viaje sostenibles en las universidades.

Impacto da Covid-19 na mobilidade

A UDC forma parte como entidade observadora do proxecto europeo U-MOB LIFE, que promove a formación de unha rede de universidades con boas prácticas de mobilidade, co obxectivo de reducir as emisións de CO₂ grazas á sensibilización da comunidade universitaria. Unha das accións derivadas da pandemia por Covid-19, foi a creación do foro de debate “Impacto da Covid-19 na mobilidade", documento orixinal e texto adaptado á realidade galega que se pode consultar NESTA LIGAZÓN.

Resultado do 'Reto da mobilidade urbana na UDC': UDC, premio á Universidade máis responsable no reto ‘Urban Mobility Challenge 2020’

A UDC participou por segunda vez neste reto para a promoción da mobilidade sustentábel. Durante ‘30 días en bici’, do 16 de setembro ao 16 de outubro, as persoas participantes acumularon quilómetros sustentábeis percorridos: camiñar, utilizar a bicicleta, o patinete eléctrico ou transporte público, desincentivando deste modo o uso do coche individual.

No cómputo xeral a UDC encóntrase no 6º posto das 12 Universidades españolas participantes, e chegando ao 1º posto en canto a número de actividades por persoa usuaria (Premio á Universidade máis responsable).

Rexistráronse 163 persoas da UDC, das que 90 participaron de forma activa durante todo o mes. Percorreron un total de 9.412 km sustentábeis, correspondentes a 2.222 kgCO2 evitados. Destes, a bicicleta foi o medio mais utilizado que sumou 6.415 km, seguidos de 1.409 km percorridos en bus e 916 camiñando.

Estudo de medios: Aproximación á mobilidade no campus universitario

O estudo, realizado pola Asociación Mobi-Liza, trata de avaliar as características de diferentes percorridos cara ao campus de Elviña, co fin de sacar unhas conclusións sobre o actual trazado da cidade, as facilidades con que contan os diferentes medios de comunicación (bus, moto, coche, bicicleta e peón), os seus problemas e as súas virtudes.

Para a realización do estudo escolléronse cinco puntos de saída diferentes e representativos: Mercado de Monte Alto, Os Rosais, praza das Conchiñas, avenida dos Caídos e Mercado de Santa Lucía.

Exposición: Aproximación a mobilidade universitaria na Coruña (Exposición)

Trátase de unha versión reducida ao "Estudo de medios: Aproximación á mobilidade no campus universitario" en formato exposición, composta por cinco paneis en roler despregábeis e disponíbeis para o préstamo á comunidade universitaria. Só é necesario un espazo duns 5 m de percorrido. Os centros, colectivos e calquera outra persoa da UDC poden solicitar e reservar esta exposición dirixíndose a oma@udc.gal.

Dun total de 5 percorridos desde a cidade, elixiuse como exemplo para a exposición o desprazamento desde Santa Lucía á Elviña. Ofrécense os datos de distancias percorridas, tempos e velocidades en medios alternativos, motorizados (coche, moto, autobús) ou non motorizados (bicicleta, a pé), xunto cos obstáculos que en diferentes áreas da cidade dificultan unha mobilidade máis sustentábel. Os mapas de isócronas, os 10 motivos para utilizar a bicicleta e un avance das liñas do plan de mobilidade da UDC completan os contidos.

Plan de mobilidade e espazo público UDC : Conclusións | Documento completo (SAUE 2010)

Este Plan foi elaborado polo prestixioso equipo da Agencia d’Ecología Urbana de Barcelona, coa participación do Servizo de Arquitectura, Urbanismo e Equipamentos e da Oficina de Medio Ambiente da UDC, entre 2009 e 2010. O plan responde a un modelo integral que pretende mellorar a calidade do ámbito universitario e a calidade de vida da súa comunidade, mellorando á súa vez a funcionalidade e a organización dos campus de Elviña e da Zapateira da UDC.

As propostas debuxan un novo modelo de mobilidade onde o número de viaxes en transporte privado se reducirá a favor de medios de transporte máis sustentables. Tamén se debuxa un novo espazo público cunha repartición de usos e funcións distinta da actual. Nos resultados compróbase que se libera espazo público que hoxe está reservado para os usos do coche, co obxectivo de que a comunidade universitaria poida ocupar o espazo público sen restricións.